Պատվաստումների դեմ թեզերը հիմնավոր չեն. դրանք բազմիցս հերքվել են

15.05.2018 | 14:28

Սոցիալական ցանցերում նորանշանակ նախարարներից մեկը, ով քննադատության թիրախում է Առողջապահության նախարար Արսեն Թորոսյանն է: Վերջինիս քննադատում են իր նախկին մտքերի համար, սակայն այդ քննադատություններն արդեն տեղափոխվում են այլ հարթություն: Մասնավորապես, փորձ է արվում կասկածի տակ դնել վարակների դեմ տարիներ շարունակ իրականացվող պատվաստումները և դրանց անհրաժեշտությունը: Մենք չենք անդրադառնա նախարարին ուղղված քննադատություններին, միայն հանրության ուշադրությունը կհրավիրենք այն թեզերի վրա, որոնք ակնհայտ սուտ և կեղծ տեղեկություներ են պարունակում պատվաստումների մասին:

  1. Պատվաստումները աուտիզմ են առաջացնում:  2003 թվականից սկսած ԱՄՆ-ի Հիվանդությունների վերահսկման կենտրոնների կողմից, որը համարվում է ապացուցողական բժշկության ամենահիմնավոր տեղեկատվություն տրամադրող կազմակերպությունն ամբողջ աշխարհում, իրականացվել են 9 գիտական հետազոտություններ՝ պատվաստանյութերի, նրանցում պարունակվող նյութերի և աուտիզմի միջև հավանական կապի պարզաբանման վերաբերյալ, որոնց արդյունքում վերջնականապես ժխտվել է աուտիզմի և պատվաստումների միջև պատճառահետևանքային կապը: Հետազոտությունների արդյունքում պարզվել է, որ աուտիզմ գրանցվում է ինչպես պատվաստված, այնպես էլ չպատվաստված երեխաների մոտ: Պատվաստանյութերի բաղադրությունում աննշան քանակությամբ առկա թիոմերսալի և աուտիզմի, ինչպես նաև նյարդային համակարգի զարգացման խանգարումների առաջացման միջև պատճառահետևանքային կապը բացակայում է:
  2. Սանիտարահիգիենիկ պայմանների բարելավումը  հանգեցնում է հիվանդությունների վերացմանը, հետևաբար պատվաստումների կարիք չկա: Չնայած, որ սանիտարահիգիենիկ պայմանների բարելավումը պաշտպանում է մարդուն մի շարք վարակիչ հիվնադություներից, այնուամենայնիվ  պատվաստումներով կանխարգելվող հիվանդությունները նորից կարող են հայտնվել, եթե պատվաստումները դադարեցվեն: Բազմաթիվ հիվանդություններ տարածվում են՝ անկախ հիգիենիկ պայմաններից: Եթե ազգաբնակչությունը պատվաստված չէ, ապա հազվադեպ հանդիպող հիվանդությունները կարող են նորից վերադառնալ, օրինակ՝ կարմրուկը, պոլիոմիելիտը:
  3. Դիֆթերիայի, կապույտ հազի և փայտացման դեմ համակցված, ինչպես նաև պոլիոմիելիտի դեմ պատվաստանյութերն առաջացնում են կրծքի հասակի երեխաների հանկարծամահություն: Չկա պատճառահետևանքային կապ պատվաստումների և կրծքի հասակի երեխաների հանկարծամահության միջև: Սակայն պատվաստումներն իրականացվում են այն ժամանակահատվածում, երբ կարող է առաջանալ կրծքի հասակի երեխաների հանկարծամահության համախտանիշը, այսինքն հանկարծամահությունը կարող է համընկնել պատվաստումների հետ կամ առաջանալ առանց պատվաստման: Կարևոր է հիշել, որ այս չորս հիվանդությունները կարող են մահվան, ծանր հաշմանդամության պատճառ հանդիսանալ և երեխաներին չպատվաստելով ենթարկում ենք ավելի մեծ ռիսկի:
  4. Միաժամանակ մեկ պատվաստումից ավել ներարկումը կարող է ունենալ կողմնակի ազդեցություն, կարող է ծանրաբեռնել երեխայի իմուն համակարգը: Ըստ  գիտահետազոտական տվյալների, մի քանի պատվաստանյութերի միաժամանակ ներմուծումը երեխայի իմուն համակարգի վրա չունի անբարեհաջող ազդեցություն: Երեխաները ամեն օր ենթարկվում են հարյուրից ավել օտար ազդակների ազդեցությանը, որոնք առաջացնում են իմուն պատասխան: Սովորաբար սննդամթերքի միջոցով օրգանիզմ են թափանցում բազմաթիվ հակամարմիններ, իսկ բերանի և քթի խոռոչում բնակվում են բազմաթիվ բակտերիաներ: Երեխան ենթարկվում է մեծ քանակի հակամարմինների ազդեցության մրսածության կամ անգինայի ժամանակ ավելի շատ, քան պատվաստման ընթացքում: Միաժամանակ մի քանի պատվաստում կատարելու հիմնական առավելություններն են՝ կրճատվում է պոլիկլինիկա այցելությունների թիվը, որը կտնտեսի ժամանակ և գումար, բարձրանում է հավանականությունը, որ երեխան կստանա անհրաժեշտ պատվաստումներն առանց խախտելու ազգային օրացույցի ժամկետները: Համակցված պատվաստումների կիրառումը նպաստում է նաև ներարկումների կրճատմանը, օրինակ, կարմրուկի, խոզուկի և կարմրախտի դեմ համակցված պատվաստանյութի օգտագործումը:
  5. Գրիպը տհաճ հիվանդություն է և պատվաստումը արդյունավետ չէ: Գրիպն ավելին է, քան տհաճ հիվանդությունը: Այն լուրջ հիվանդություն է, որն ամբողջ աշխարհում տարեկան 300-500 հազար մարդու մահվան պատճառ է հանդիսանում: Ռիսկի խումբ են կազմում հղի կանայք, փոքր տարիքի երեխաները, տարեցները, սիրտ-անոթային, շնչառական համակարգի խրոնիկ հիվանդները: Հղի կանանց պատվաստումը երկակի դրական ազդեցություն ունի, այն պաշտպանում է նաև նորածիններին /քանի որ չկա գրիպի պատվաստանյութ 6 ամսականից ցածր երեխաների համար/: Պատվաստումը ապահովում է պաշտպանություն յուրաքանչյուր սեզոնին շրջանառվող երեք ամենատարածված շտամերի նկատմամբ: Գրիպի դեմ պատվաստանյութը լավագույն մեթոդն է նվազեցնել ծանր գրիպով հիվանդացության հնարավորությունը և չվարակել շրջապատի մարդկանց: Խուսափել գրիպից նշանակում է խուսափել լրացուցիչ ծախսերից:
  6. Ավելի լավ է իմունիտետ ձեռք բերել հիվանդանալու արդյունքում, քան պատվաստման: Պատվաստանյութերը փոխազդում են իմունային համակարգի հետ` առաջացնելով իմուն պատասխան, որը նման է բնական վարակի նկատմամբ առաջացած իմուն պատասխանին, սակայն պատվաստանյութերը հիվանդություն չեն առաջացնում և պատվաստվածին հավանական բարդությունների ռիսկի չեն ենթարկում: Ի տարբերություն դրան, բնական վարակի արդյունքում անընկալություն ստանալու համար հնարավոր է, ստիպված լինեք վճարել, հեմոֆիլուսային Բ տիպի վարակի (Hib) առաջացրած մտավոր հետամնացությամբ, կարմրախտի հետևանքով` բնածին արատներով, վիրուսային հեպատիտ Բ-ից` լյարդի քաղցկեղով կամ կարմրուկից` մահով:
  7. Պատվաստանյութերը պարունակում են առողջության համար վնասակար սնդիկ: Թիոմերսալը սնդիկ պարունակող օրգանական նյութ է, որն ավելացնում են որոշ պատվաստանյութերի մեջ որպես կոնսերվանտ: Սա բազմադեղաչափ շշիկներով առաքվող պատվաստանյութերի մեջ կիրառվող ամենատարածված կոնսերվանտն է: Գոյություն չունեն առողջության համար վնասակար լինելու վերաբերյալ տվյալներ թիոմերսալի` պատվաստանյութերում օգտագործվող քանակի վերաբերյալ:

Իմունականխարգելման ազգային ծրագրի տվյալների համաձայն՝ վերջին ժամանակահատվածում հակապատվաստումային տեղեկատվության տարածումից հետո նկատվում է պատվաստումների ցուցանիշների անկում: Մասնավորապես, 1 տարեկան երեխաների պատվաստումներում ամբողջական ընդգրկվածությունը 94 %-ից (2010 թ.) նվազել է մինչև 90 % (2018թ. մարտ): Նման միտումները վտանգավոր են, քանի որ այդ պարագայում կարող են դիտվել որոշ հիվանդությունների հետ վերադարձ:

Պատվաստումներին դեմ արտահայտվողները քննարկումներ են ծավալում ֆեյսբուքյան հետևյալ խմբերում՝ «Հայ ծնողների ակումբ», «Հայ կանանց ակումբ», «Կոնսուլտանտները», «Հղիների/Մայրիկների ակումբ», «Հարցեր բժիշկներին-բժշկական խորհրդատվություն», «Mapa.am», «Մեր բալիկը», «Ամեն ինչ պատվաստումների մասին»: Ասվածը չի նշանակում, որ այդ խմբերում բացառապես ապատեղեկատվություն են տարածում:






Կարդացեք նաև։

Նաիրիտի ծխի վնասակարությունը (տեսանյութ)

Օգոստոսի 28-ին սկսեցին այրվել «Նաիրիտ» գործարանի Էթինոլ-լակ անվանմամբ նյութի պահեստները (մոտ 200 խմ ծավալով): Արտակարգ իրավիճակների նախարարությունը հայտարարել է, որ «այրման արգասիքները (ջուր և ածխաթթու գազ) նույնպես վտանգ չեն ներկայացնում մարդկանց համար»։…


ԱԻՆ-ը ստում է ծխի արգասիքների ու վտանգի մասին

Ինչպես հայտնի է, երեկվանից անդադար այրվում են «Նաիրիտ» քիմիական գործարանի Էթինոլ-լակ («Этиноль-лак»)  անվանմամբ նյութի պահեստները (մոտ 200 խմ ծավալով): Արտակարգ իրավիճակների նախարարությունը հայտարարել է, որ նյութն ամենայն հավանականությամբ ինքնաբռնկվել է…


Կենսաբանական զենքի մասին անհեթեթ տեղեկությունը հասավ Regnum

Օրերս ռուսական Regnum գործակալությունը ներկայացրեց մի ուսումնասիրություն, համաձայն որի ԱՄՆ պաշտպանության դեպարտամենտի «Վտանգների նվազեցման գործակալության» ֆինանսավորմամբ 2016 թվականին Երևանում, Գյումրիում և Իջևանում բացված ռեֆերենս լաբորատորիաները ունեն երկակի նշանակություն և կարող…


«Կենսաբանական զենքերի» լաբորատորիան նաև ՌԴ-ից է փող ստանում

2016 թվականի նոյեմբերի 24-ին SUT.am-ը անդրադարձել էր «Բժշկա-կենսաբանական լաբորատորիաները Հայաստանի անվտանգության եւ ինքնիշխանության համատեքստում» թեմայով համաժողովին, որի ընթացքում սուտ տեղեկություններ էին հրապարակվել ՀՀ-ում ԱՄՆ ֆինանսավորմամբ կենսաբանական զենք ստեղծելու մասին։ Մասնավորապես,…