Ծուխ հեռուստադիտողների աչքերին Հանրայինի եթերից

12.04.2018 | 17:01

Մարտի 31-ին «Քաղաքացիական պայմանագիր» կուսակցության մեկնարկած «Իմ քայլը» նախաձեռնությունը հայաստանյան համապետական սփռում ունեցող գրեթե բոլոր հեռուստաընկերությունների լրատվական թողարկումները խուսափում են լուսաբանել։ Շարժման իրականցրած ակցիաները չի լուսաբանում նաև Հանրային հեռուստաընկերությունը։ Դրա մեկնարկից մինչև ապրիլի 10-ն ընկած ժամանակատվածում Առաջին ալիքը որևէ կերպ չի լուսաբանել և չի անդրադարձել այս նախաձեռնությանը, որը նպատակ ունի կասեցնել Սերժ Սարգսյանի կողմից իշխանության պահպանումը երկրի վարչապետի պաշտոնում։ «Իմ քայլի» մեկնարկից 12 օր անց անգամ լուսաբանելով «Ելք» դաշինքի պատգամավորներ Արարատ Միրզոյանի և Լենա Նազարյանի իրականացրած ակցիան խորհրդարանում՝ հեռուստաընկերությունը կոծկել է դրա նպատակը։

Ապրիլի 11-ին Արարատ Միրզոյանը Ազգային ժողովի ամբիոնից իր ելույթում կոչ էր արել հանրությանը կանխել Սերժ Սարգսյանի երրորդ ժամկետով իշխանավարումը, վերջ տալ ՀՀԿ իշխանությանը և ներկա լինել Ազատության հրապարակում կայանալիք  հավաքին, ինչից հետո ծխարձակիչ գլանակ էր գործածել։

Հանրային հեռուստաընկերության «Օրակարգ» լրատվականը, լուսաբանելով պատգամավորի գործողությունները, չի ներկայացրել, թե ինչ նպատակով է արվել այն՝ իրադարձությանն անծանոթ հեռուստադիտողի համար անհասկանալի թողնելով նման քայլի նպատակը։ Չցուցադրելով Արարատ Միրզոյանի ելույթը և հպանցիկ ներկայացնելով միայն տեղի ունեցածը՝ հեռուստաընկերությունը փոխարենն անհամեմատ երկար ներկայացրել է դրա վերաբերյալ արված քննադատությունները։ Այդ թվում են ԱԺ խոսնակ Էդուարդ Շարմազանովի՝ ակցիան «շոու» անվանելու և այն «չստացված» որակելու դրվագը, «Ելքի» մեկ այլ պատգամավոր Մանե Թանդիլյանի մեկնաբանությունը և ԱԺ նախագահ Արա Բաբլոյանի հայտարարությունը, թե ինքն «ընդունում է այս արարքը որպես անընդունելի»։

Փոխարենն «Օրակարգի» նույն թողարկմանը նախընտրել են մոտ 5 րոպե հատկացնել «Արագիլ» հիմնադրամի գործունեության լուսաբանմանը՝ շեշտադրելով դրանում հանրապետության արդեն նախկին առաջին տիկին Ռիտա Սարգսյանի ունեցած դերը՝ որպես հիմնադրամի հոգաբարձուների խորհրդի նախագահ։

ԱԺ դահլիճում տեղի ունեցածը նույն կերպ է լուսաբանել «Արարատ» հեռուստաընկերությունը՝ չպատմելով ակցիայի նպատակի մասին ներկայացնելով միայն դրա հասցեին հնչեցված քննադատությունները։

«Ելքի» պատգամավորների իրականացրած ակցիան լուսաբանած «Շանթ» հեռուստաընկերության «Հորիզոն»  լրատվականը մեկ հատված ներկայացրել է Միրզոյանի ելույթից, – «Եկել է պահը, երբ մենք կարող ենք վերջ տալ ՀՀԿ իշխանությանը և կերտել մեր երազանքների Հայաստանը», պատմելով, որ ծխարձակումը պատգամավորն արել է «Իմ քայլը» շարժման մասին խոսելիս։ Սակայն Միրզոյանը իր ելույթի ժամանակ նաև կոչ է արել քաղաքացիներին մասնակցել ապրիլի 13-ին Ազատության հրապարակում կայանալիք հանրահավաքին և այս «ծխային» ակցիայի բուն նպատակը հանրահավաքի մասին իրազեկումն էր։

«Արմենիա» հեռուստաընկերության «Ժամը» լրատվականը «Ելք» դաշինքի երկու պատգամավորների նախաձեռնած ակցիան օգտագործել է դաշինքում եղած տարաձայնությունների մասին պատմելու համար՝ կրկին չներկայացնելով Միրզոյանի ելույթը։ «Վերջին շրջանում «Ելք» խմբակցությունում տարաձայնություններ կան խորհրդարանական կառավարմամբ նոր իշխանություն ձևավորելու և վարչապետի թեկնածուների հարցում», – ասվում է ռեպորտաժում՝ առանց հստակեցնելու, թե ում վարչապետության վերաբերյալ են քննարկումները և ում դեմ է ուղղված այս նախաձեռնությունը։

Ի դեպ, «Իրազեկ քաղաքացիների միավորումը» ապրիլի 11-ին միջանկյալ զեկույց է հրապարակել «Արմենիա», «Շանթ» և Հանրային հեռուստաընկերություններով Սերժ Սարգսյանի նախագահության վերջին օրերին նրա վերաբերյալ լուսաբանման, ինչպես նաև ընդդիմադիր ուժերի կողմից վերջինիս դեմ սկսված քաղաքական շարժումների լուսաբանման մասին։ Զեկույցի համաձայն՝ Հանրային հեռուստաընկերությունը մարտի 31-ից ապրիլի 9-ն ընկած ժամանակահատվածում որևէ կերպ չի լուսաբանել ընդդիմության «Իմ քայլը» և «Մերժիր Սերժին» շարժումները։ Համեմատաբար «բալանսավորված» լուսաբանում ապահովել է «Շանթ» հեռուստաընկերությունը։ «Արմենիա» հեռուստաընկերությունն, ինչպես վերոնշյալ դեպքում, անդրադարձել է դրան մեկ անգամ և հպանցիկ՝ ընդգծելով միայն «Ելք» դաշինքում տարաձայնության առկայությունը։ Փոխարենը հեռուստաընկերությունները միայն դրական կերպով են լուսաբանել Սերժ Սարգսյանի տասնամյա գործունեությունը։ «Արմենիան» և Հանրային հեռուստաընկերությունները Սերժ Սարգսյանի տասը տարիներն ամփոփել են նաև նրա մասին փաստավավերագրական ֆիլմերով։ Զեկույցին առավել մանրամասն կարող եք ծանոթանալ այստեղ։

Լուսանկարը՝  hetq.am-ի






Կարդացեք նաև։

Հ1-ը 2017 թ-ի ԱԺ ընտրությունների գնահատականներից միայն դրականն է «հիշում»

Ապրիլի 8-ին Հայաստանի Հանրային հեռուստաընկերության կիրակնօրյա ամփոփ թողարկման՝ «360 աստիճան»-ի շրջանակներում անդրադարձ է կատարվել 2017 թվականի խորհրդարանական ընտրություններին: Ռեպորտաժի հեղինակը նշել է, որ ԵՄ-ն և ԵԱՀԿ/ԺՀՄԻԳ-ը դրական են գնահատել տեղի…


Հեռուստաընկերությունները խոսում են ամեն ինչից, բացի «Իմ քայլը» ակցիայից (լրացված)

«Քաղաքացիական պայմանագիր» կուսակցությունը մարտի 31-ին հրապարակեց Սերժ Սարգսյանի վարչապետ դառնալու դեմ պայքարի ճանապարհային քարտեզը: Այն հրապարակվեց Գյումրի քաղաքի Վարդանանց հրապարակում, որից հետո հայտարարվեց, որ ՔՊ անդամները քայլերթով Գյումրիից հասնելու են…


Ապատեղեկատվություններ և բռնության արդարացում Արմենիա TV-ի եթերում

Փետրվարի 18-ին «Արմենիա» հեռուստաընկերության «Բանաձև ակումբ» հաղորդաշարի 16-րդ թողարկմանը քննարկվել է Երևանի քաղաքապետարանում ավագանու «Երկիր Ծիրան»ի և Հանրապետական խմբակցությունների անդամների միջև տեղի ունեցած ծեծկռտուքը։ Հաղորդմանը հրավիրվել էին «Ելք» խմբակցության ղեկավար…


Հ1-ը լռում է զինծառայողի վիրավորման հանգամանքների մասին

Վերջին օրերին հայկական ԶԼՄ-ների ուշադրության կենտրոնում հայտնվեց նախկին զինծառայող Ալբերտ Դալլաքյանի վիրահատության համար անհրաժեշտ գումարի հանգանակության կազմակերպումը։ Դրամահավաքին միանալու կոչ էր արել էր նաև պաշտպանության նախարար Վիգեն Սարգսյանը։ Սարգսյանի կոչից…