Ոստիկանությունը խախտում է օրենքները և մեղադրում ցուցարարներին (տեսանյութ)

12.04.2018 | 12:00

Ապրիլի 10-ին ոստիկանությունը հաղորդագրություն է տարածել, որով մեղադրել է վերջին օրերի ցույցերի կազմակերպիչներին օրենքը խախտելու մեջ ու կոչ արել «ձեռնպահ մնալ հասարակական կարգը խախտող գործողություններ կատարելուց»: Մի կողմ թողնելով ցուցարարների գործողությունների իրավաչափության գնահատումը (հաշվի առնելով դրանց մասսամբ ինքնաբուխ լինելը)՝ արձանագրենք, որ այդ հավաքների ժամանակ հենց ոստիկանությունն է խախտում օրենսդրության պահանջները:

Ոստիկանություն չկա՞ր

Այսպիսով, 2018 թվականի մարտի 24-ին, ապրիլի 9-ին և 11-ին «Մերժիր Սերժին» նախաձեռնությունը Երևանի կենտրոնում իրականացրել էր հարյուրավոր մասնակիցներով հավաքներ և երթեր, որոնք չեն ուղեկցվել ոստիկանության համազգեստով ծառայողների կողմից:

«Հավաքների մասին» ՀՀ օրենքի 32-րդ հոդվածի համաձայն՝ ոստիկանությունը պարտավոր է ապահովել իր ներկայացուցչի ներկայությունը հավաքին: Իսկ «Ոստիկանության մասին» ՀՀ օրենքի 12-րդ հոդվածն ամրագրում է, որ «Ոստիկանությունը պարտավոր է ապահովել հասարակական կարգի պահպանությունը փողոցներում, հրապարակներում… Հասարակական կարգի պահպանությունն ապահովելիս ոստիկանության ծառայողները պարտավոր են կրել սահմանված ձևի համազգեստ, որի վրա տեսանելի մասում փակցվում են ոստիկանության ծառայողին անձնապես նույնականացնելու հնարավորություն տվող տարբերանշաններ»:

Այնինչ մարտի 24-ին, ապրիլի 9-ին ու 11-ին տեղի ունեցած հանրահավաքներին և երթերին համազգեստով գեթ մեկ ոստիկան չկար: Ներկա էին բացառապես քաղաքացիական հագուստով ոստիկանության քրեական հետախուզության աշխատակիցներ (օպերլիազորներ), ովքեր որևէ կերպ չէին միջամտում:

Տեսանկարահանել են խախտմամբ

Քաղաքացիական հագուստով ոստիկաններից շատերը, սակայն, հավաքի ժամանակ խախտում էին նաև այլ իրավակարգավորում: Մասնավորապես, վերջերս ընդունված «Ոստիկանության մասին» օրենքի փոփոխություններով (դրա 22-րդ հոդվածով) ամրագրվել է, որ «Հանցագործությունները կանխելիս կամ բացահայտելիս, հասարակական կարգի պահպանությունն ապահովելիս ոստիկանության ծառայողները կարող են օգտագործել շարժական տեսաձայնագրող կամ լուսանկարահանող տեխնիկական միջոցներ… Տեսաձայնագրող կամ լուսանկարահանող տեխնիկական միջոցն ամրացվում է ոստիկանության ծառայողի համազգեստին կամ գտնվում է ոստիկանության ծառայողի ձեռքում կամ ոստիկանության ծառայողական տրանսպորտային միջոցում: … Սույն մասով նախատեսված տեսաձայնագրող կամ լուսանկարահանող տեխնիկական միջոցներով ոչ գաղտնի վերահսկողության մասին ոստիկանության ծառայողը պարտավոր է բանավոր նախազգուշացնել: Տեսաձայնագրումը, տեսանկարահանումը և լուսանկարահանումն իրականացվում են միայն ծառայողական (ոչ անձնական) տեխնիկական միջոցներով»:

Այնինչ լրագրողների (այդ թվում՝ մեր) տեսախցիկները ֆիքսել են ոստիկանության ծառայողների, ովքեր իրենց անձնական բջջային հեռախոսներով նկարահանում էին ցույցն ու դրա մասնակիցներին՝ առանց այդ մասին նախազգուշացնելու:

previous arrow
next arrow
Slider

Այդ կերպ ոստիկանները խախտում էին ոչ միայն «Ոստիկանության մասին» օրենքի 22-րդ հոդվածը, այլև «Անձնական տվյալների մասին» օրենքը, քանի որ այդ նկարահանումներով ցույցի մասնակիցների մասին անձնական տվյալներ էին հավաքագրվում:






Կարդացեք նաև։

«Իրատես» թերթը ապատեղեկատվություն է տարածում

«Իրատես» թերթն իր հերթական համարում անդրադարձել է ոստիկանապետ Վալերի  Օսիպյանին՝ մատնանշելով նրա օրոք ոստիկանությունում տիրող «խնդրահարույց իրավիճակը»։ Խոսքը մասնավորապես վերաբերում է ոստիկանությունում սկսված կադրային արտահոսքին։ Թերթի տեղեկություններով` ճանապարհային ոստիկանության աշխատակիցների…


Նոր Գյուղում ավելի շատ վարորդական վկայական է տրամադրվել, քան Երևանում (վիճակագրություն)

Վերջին տարիներին Հանրապետությունում աճել է ավտոմեքենաների քանակը։ Դրան զուգահեռ ավելացել են վարորդները, հաճախացել են ճանապարհատրանսպորտային պատահարները։ Դատելով տարեկան արձանագրվող ճանապարհատրասնպորտային պատահարների քանակից, ինչպես նաև արձանագրված տուգանքների քանակից՝ կարելի է եզրակացնել,…


Ոստիկանությունը չի կարող արգելել դրոններով նկարահանումը

Օգոստոսի 17-ին, կառավարության պաշտոնավարման 100 օրվա կապակցությամբ  կայանալիք հանրահավաքին ընդառաջ, ոստիկանությունը հայտարարություն տարածեց, որով արգելեց դրոնների օգտագործումը հանրահավաքի ընթացքում: «Զանգվածային լրատվության միջոցներին հայտնում ենք, որ օգոստոսի 17-ին տեղի ունենալիք հանրահավաքի…


Ինչպես են գործել կոռուպցիոն սխեմաները Վլադիմիր Գասպարյանի պաշտոնավարման տարիներին

Երևան քաղաքի Կոմիտասի պողոտայի և Վաղարշյան փողոցների հատման մասում արդեն կառուցվել է հերթական բազմահարկ բնակելի շենքը: Խորհրդային միության տարիներին տվյալ տարածքում կառուցվել էր կարի ֆաբրիկա, որը հետագայում դարձավ ՀՀ ոստիկանության…