Ռուսական «НТВ»-ի ստերը Հայաստան-ԵՄ հարաբերությունների մասին

30.11.2017 | 14:34

ՀՀ-ԵՄ «Համապարփական և ընդլայնված գործընկերության» համաձայնագրի ստորագրումը դարձել է վերջին օրերի ռուսական քաղաքական թոք շոուների քննարկման հիմնական թեմաներից մեկը։ Դաշնային «НТВ» հեռուստաընկերության «Հանդիպման վայր» (Место встречи) հաղորդման նոյեմբերի 28-ի թողարկումն ամբողջությամբ նվիրված է ԵԱՏՄ անդամ հանդիսացող Հայաստանի և Բելառուսի եվրաինտեգրացիոն քաղաքականությանն ու Մոլդովային։ Հիմնական շեշտը դրված է նոյեմբերի 24-ին Բրյուսելում ստորագրված ՀՀ-ԵՄ նոր համաձայնագրի վրա։

Հայաստանի «ամուսինն» ու «սիրեկանը»

Մինչ հաղորդման մեջ շրջանառված մի շարք ապատեղեկատվություններին անդրադառնալը, հարկ է նշել, որ հաղորդումն ակնհայտ ծաղրանքով է լուսաբանում Հայաստանի արտաքին քաղաքականությունում ընթացող գործընթացները։ Ի սկզբանե, հաղորդման հաղորդավարները և ներկա փորձագետները ծաղրում են հայկական «հպարտության կոմպլեքսը»։ Հաղորդման ընթացքում Հայաստանի Հանրապետությունը պարբերաբար համեմատվում է կնոջ հետ, ով ցանկանում է երիտասարդ սիրեկան ունենալ։ Նման կերպ մեկնաբանվում է  Հայաստանի որոշումը՝ խորացնել համագործակցությունը Եվրոպական միության հետ։ ՀՀ քաղաքականությունը համեմատվում է ընտանեկան դավաճանության հետ։ Փորձագետները ծաղրում են նաև, թե ԵՄ-ն չունի Հայաստանի կարիքը և նման մերձեցումն ուղղակի Ռուսաստանին վատություն անելու փորձ է։

Փաստերի աղավաղում

Հաղորդման ընթացքում, խոսելով Ղարաբաղյան հակամարտության մասին, ռուսական հեռուստաընկերության եթերում մի շարք փաստական ապատեղեկատվություններ են հնչում։ Նախ «НТВ»-ն, պատմելով 2016-ի ապրիլին Լեռնային Ղարաբաղում իրավիճակի լարման մասին, հայտնում է մարտերի արդյունքում 33 զոհերի մասին։ Այնինչ, հայկական կողմն ունեցել է 92 զոհ, իսկ ադրբեջանականը, տարբեր տվյալներով, 31-ից 800։

Մեկ այլ ապատեղեկատվություն՝ «НТВ»-ն մեկնաբանել է Ղարաբաղյան հակամարտության լուծման հարցում ԵՄ որդեգրած քաղաքականությունը։  Հեռուստաընկերության հաղորդավարները հայտարարում են, որ Եվրամիությունը գործնականում ճնշում է գործադրում Հայաստանի նկատմամբ՝ «պահանջելով դուրս բերել զորքերը չճանաչված հանրապետությունից», ինչը բացարձակապես չի համապատասխանում իրականությանը։ Անգամ հակառակը, չնայած Ադրբեջանի բազմաթիվ ջանքերին, նոյեմբերի 24-ին Բրյուսելում Արևելյան գործընկերության գագաթաժողով հռչակագրում պրոադրբեջանական ձևակերպում տեղ չգտավ։ ԵՄ-ն հավատարիմ գտնվեց իր իսկ սկզբունքներին և նախընտրեց պարզապես բաց թողնել Արևելյան գործընկերության գագաթաժողովների հռչակագրերում ավանդաբար ներառվող պարբերությունը տարածաշրջանային հակամարտությունների վերաբերյալ։ Ավելին՝ Եվրամիություն-Հայաստան նոր համաձայնագրում, ի հեճուկս Ադրբեջանի ցանկության, հղում կա ազգերի ինքնորոշման իրավունքին։

Կեղծ թվեր

Իրականությանը չհամապատասխանող հայտարարություններ կան նաև ՀՀ-Ռուսաստան և ՀՀ-Եվրամիություն հարաբերույթուններում առկա տնտեսական ցուցանիշների մասով։ Մասնավորապես, նշվում է, որ ՌԴ-ը հանդիսանում է ՀՀ առաջատար առևտրային գործընկերը, որոնց միջև առևտրաշրջանառության ծավալը գերազանցում է 1 միլիարդ դոլարը: Իսկապես, 2017թ.-ի 3-րդ եռամսյակի ավարտին արդեն ՀՀ-ՌԴ առևտրաշրջանառությունը կազմել է 1.074 մլրդ դոլար (ըստ ԱՎԾ տվյալների), սակայն նույն ժամանակաշրջանում ՀՀ-ԵՄ առևտրաշրջանառությունը կազմել է 1.095 մլրդ դոլար: Հատկանշական է, որ ԵՄ-ը, գրանցելով աճի բավականին բարձր տեմպեր, առաջ է անցել թե՛ արտահանման (շուրջ 34% աճ), թե՛ ներմուծման ցուցանիշներով (շուրջ 21% աճ):

Հաղորդման մեջ խոսվում է նաև ՌԴ-ից ՀՀ իրականցված օտարերկրյա ներդրումների մասին: Համաձայն ներկայացվող տվյալների՝ անկախացումից ի վեր ՌԴ-ից մեր երկիր է ուղղվել ավելի քան 4 մլրդ դոլար ֆինանսական միջոցներ: Մինչդեռ 2017թ.-ի հուլիս ամսվա դրությամբ անկախությունից ի վեր ՀՀ-ում կատարված օտարերկրյա ներդրումների համախառն հոսքերը կազմել են մոտ 6,8 մլրդ դոլար, որից միայն մոտ 2,4 մլրդ-ն է բաժին ընկնում ՌԴ-ին:

Հ.Գ. Հիշեցնենք, որ НТВ հեռուստաալիքը պատկանում է «Գազպրոմ մեդիա հոլդինգին», որն անուղղակիորեն պատկանում է Ռուսաստանի կառավարությանը և 2016 թվականից ամերիկյան պատժամիջոցների տակ է:






Կարդացեք նաև։

«Միասնական Ռուսաստանի» երևանյան սուտը

Նոյեմբերի 28-ին Երևանում կայացավ ՌԴ իշխող կուսակցության՝ «Միասնական Ռուսաստանի» («Единая Россия») պատվիրակության և Հայաստանի Հանրապետական կուսակցության ներկայացուցիչների հանդիպումը։ Լրագրողների հետ հանդիպման ընթացքում «Միասնական Ռուսաստանի» գլխավոր խորհրդի քարտուղարի տեղակալ Սերգեյ Ժելեզնյակը…


Ռուսական «Առաջին ալիքի» ստերը Հայաստանի մասին

Ռուսաստանի առաջին ալիքի «Время покажет» հաղորդման ուրբաթօրյա թողարկումը նվիրված էր ԵՄ ԱլԳ գագաթաժողովին ու Հայաստանին։ Առիթը ԵՄ-ի հետ ստորագրված  Համապարփակ և ընդլայնված գործընկերության համաձայնագիրն էր։ Հաղորդման ընթացքում, բացի քարոզչությունից, այլախոհներին…


Ինչպե՞ս է Russia Today-ը խաբում Facebook-ի հայաստանցի օգտատերերին

Հոկտեմբերի վերջին Twitter սոցիալական ցանցն արգելեց ռուսական Russia Today հեռուստաընկերությանը և «Սպուտնիկ» լրատվական գործակալությանը գովազդներ տեղադրել իր ցանցում։ Արգելքի հիմքում այս երկու լրատվամիջոցների «միջամտությունն» է 2016 թվականի ԱՄՆ նախագահական ընտրություններին։…


Ռուսական «Զվեզդայի» կեղծ «Կանխատեսումները» Հայաստանի մասին

Ռուսաստանի Պաշտպանության նախարարության «Զվեզդա» դաշնային հեռուստաընկերությունը  «Կանխատեսումներ» («Прогнозы») հաղորդման նոյեմբերի 19-ի թողարկման շրջանակներում անդրադարձել է նոյեմբերի վերջին ՀՀ-ԵՄ նոր համաձայնագրի ստորագրմանը՝ հայտարարելով, թե Հայաստանը պատրաստվում է մտնել Եվրամիություն։ «Եվրամիություն է պատրաստվում…