Ադրբեջանում ստում են Բաքվում բնակվող 20 հազար հայերի մասին

24.11.2017 | 14:27

Ադրբեջանի գիտությունների ազգային ակադեմիայի աշխարհագրության ինստիտուտի մարդկանց աշխարհագրության բաժնի ղեկավար Զաքիր Էմինովը նոյեմբերի 22-ին ակադեմիայում տեղի ունեցած սեմինարի ժամանակ որոշ ուշագրավ տվյալներ էր ներկայացրել Ադրբեջանի բնակչության վերաբերյալ:

Մասնավորապես, Էմինովը պնդել էր, որ Ադրբեջանի տարածքում բնակվում են շուրջ 120 հազար հայեր, իսկ կոնկրետ Բաքվում` 20 հազար:

Թե ի՞նչ տրամաբանությամբ է Էմինովը կատարել իր հաշվարկները` պարզ չէ: Հնարավոր է, որ նա, հավատարիմ Բաքվի պաշտոնական դիրքորոշմանը, Արցախը համարել է Ադրբեջանի անբաժանելի մաս և ըստ այդմ հաշվել ղարաբաղցիներին՝ որպես Ադրբեջանի տարածքում բնակվող հայեր: Սա կարող է բնորոշ լինել ադրբեջանական ավանդական քարոզչությանը և հռետորաբանությանը, սակայն նույնիսկ այս դեպքում ծայրերը միմյանց չեն հասնում:

Այսպես, ըստ ԼՂՀ պաշտոնական տվյալների, Արցախի բնակչությունը կազմում է 146,6 հազար մարդ, այսինքն ավելի, քան Էմինովի նշած 120 հազարը:

Ինչ վերաբերում է Ադրբեջանի պաշտոնական տվյալներին, ապա ըստ 1989 թվականի համամիութենական մարդահամարի տվյալների՝ Ադրբեջանական ՍՍՀ տարածքում բնակվել է 390 հազար 505 հայ, իսկ արդեն 2009 թվականի մարդահամարի տվյալների համաձայն` 120.300 հայ: Միևնույն ժամանակ, սակայն, ըստ Ադրբեջանի վիճակագրության պետական հանձնաժողովի 1999 թվականի տվյալների՝ Բաքվում բնակվել է ընդամենը 378 հայ: Սա այն դեպքում, որ դրանից ընդամենը 10 տարի առաջ` մինչ Բաքվում էթնիկ զտումները, այդ քաղաքում 1989 թվականի մարդահամարի տվյալներով՝ բնակվել է ավելի քան 200 հազար հայ: Այսինքն, Բաքուն Ադրբեջանի անկախության ընթացքում մոտ 99,8 տոկոսով հայաթափվել է:

Ստացվում է, որ եթե նույնիսկ ընդունենք, որ խոսելով Ադրբեջանում 120 հազար հայերի բնակության մասին, Բաքուն ընդամենը տուրք է տալիս իր պետական հռետորաբանությանը և Արցախը համարում իր երկրի մաս (սակայն, ինչպես նշվեց վերը, 120 հազարը չի համապատասխանում ԼՂՀ պաշտոնական վիճակագրությանը), ապա էմինովի մյուս պնդումը, թե Բաքվում 20 հազար հայ է բնակվում, ընդհանրապես չի տեղավորվում ոչ տրամաբանության, ոչ պաշտոնական վիճակագրության շրջանակներում:

Իհարկե, հնարավոր է, որ Բաքվում և Ադրբեջանի այլ քաղաքներում կան հայեր, ովքեր թաքցնում են իրենց ինքնությունն անվտանգության նկատառումներով, բայց այսպես կոչված «ծպտյալ» հայերի մասին ոչ մի ստույգ տվյալներ լինել չեն կարող:






Կարդացեք նաև։

Ալիևը դատապարտել է Երևանում դեռ չկայացած ընտրությունների արձագանքը

Ադրբեջանի նախագահ Իլհամ Ալիևը Երևանի ավագանու ընտրությունների նախօրեին թվիթերյան իր էջում անդրադարձել է Երևանում կայանալիք ավագանու ընտրություններին։ «Պետք է ուսումնասիրել միջազգային դիտորդների դրական արձագանքը Հայաստանում վերջին ընտրությունների կապակցությամբ», – գրում…


Ինչպե՞ս տարածվեցին «Արցախը հանձնելու» մասին կեղծ լուրերը

Վերջին օրերին սոցիալական ցանցերում, ինչպես նաև որոշ լրատվական կայքերի և փորձագետների կողմից քննարկման առարկա դարձավ «Արցախը հանձնելու» թեման։ Նախկին իշխանությունը և իրեն սատարող ակտիվը տարբեր գործիչներին մեղադրեց «հակաարցախյան գործունեության» մեջ։…


Կարպիս Փաշոյանի դեմ մեդիա-տեռորը փորձարկվել է նաև Նիկոլ Փաշինյանի դեմ

Ժամանակակից լրատվությունը սահմանակցում է մի կողմից պրոպագանդայի, մյուս կողմից մանիպուլյացիայի հետ։ Մեդիայի նպատակը հաճախ մի փոքր այլ է, քան օբյեկտիվ տեղեկության մատակարարումը։ Հաճախ այն կարծիքի ստեղծման, կարծրատիպեր կոտրելու, այս կամ…


Ասյա Խաչատրյանը Ադրբեջանում չի եղել՝ հակառակ Գառնիկ Իսագուլյանի

Փետրվարի 1-ից 3-ը Արցախի ոստիկանների կողմից բռնության և անհարգալից վերաբերմունքի արժանացած ՀՀ քաղաքացի, 19-ամյա Ասյա Խաչատրյանի մասին Հայաստանում Արցախի մշտական ներկայացուցչության խորհրդական-խորհրդատու Գառնիկ Իսագուլյանը կեղծ տեղեկություն է ներկայացրել ԶԼՄ-ներին: Իսագուլյանը…