Հ1-ը «փոխեց» աշխարհահռչակ գիտնականի կարգավիճակը

08.11.2017 | 16:38

Նոյեմբերի 7-ին Հանրային հեռուստաընկերության «Օրակարգ» հաղորդման առավոտյան 9-ի թողարկումը լուսաբանել էր համաշխարհային ճանաչում ունեցող հայազգի գիտնականներ Յուրի Օգանեսյանի և Անի Ափրահամյանի հանդիպումը ՀՀ նախագահ Սերժ Սարգսյանի հետ։

Անգրագիտություն

«Օրակարգը» այս թողարկման ընթացքում ամերիկահայ ֆիզիկոս Անի Ափրահամյանին ներկայացրել էր որպես Յուրի Օգանեսյանի կին, իսկ թողարկման վերջում էլ նշել էր, որ գիտնականները զույգ են։ Սակայն դա սուտ է՝ երկու գիտնականները ոչ զույգ են, ոչ էլ ամուսիններ:

Ավելին՝ «Օրակարգը» որևէ կերպ չի անդրադարձել այն հանգամանքին, որ ամերիկահայ գիտնական Անի Ափրահամյանը բազմաթիվ գիտական ձեռքբերումներ ունեցող և միջազգային ճանաչում վայելող գիտնական է, մինչդեռ Յուրի Օգանեսյանի գիտական կոչումները Հանրայինի եթերում թվարկվում են։

Այնինչ, Անի Ափրահամյանը Ամերիկայում ամենահայտնի միջուկային ֆիզիկոսներից է: Նա նաև Ֆիզիկոսների ամերիկյան ասոցիացիայի միջուկային ֆիզիկայի ստորաբաժանման ղեկավարն է:

Դժվար է ասել, թե ինչով է պայմանավորված այս սուտը։ Միգուցե «Օրակարգի» լրագրողների ոչ կոմպետենտությամբ։ Հնարավոր է նաև, որ լրագրողը չէր պատկերացնում, որ կինը կարող է հաջողակ գիտնական լինել:

Գիտություն

Բացի այդ, «Օրակարգում» հատուկ շեշտվում է, որ Յուրի Օգանեսյանը այցելել է Հայաստան Համահայկական գիտական համաժողովին մասնակցելու համար։ Ըստ հաղորդավարի խոսքի՝ գիտնականը ՀՀ նախագահից անցյալ տարի խնդրել էր Համահայկական գիտական համաժողովը դարձնել ամենամյա։ Այնուհետև մեջբերվում է գիտնականի խոսքը․ «Ասացի լավ կլիներ, որ դա լիներ ամեն տարի, ընդունվեց։ Այս տարի երկրորդն էր, պատկերացրեք, ոչ պակաս, նույնիսկ ավելի լավ»։

Համահայկական գիտական համաժողովը Սերժ Սարգսյանի կողմից ամենամյա դարձնելու վերաբերյալ «Օրակարգի» անդրադարձը երևի որևէ կերպ հեռուստադիտողի ականջը չծակեր, եթե այս հաղորդումը չհեռարձակվեր ՀՀ իշխանությունների կողմից վերջերս կայացված և հայկական գիտությանը վնաս հասցնող երկու խոշոր որոշումից հետո։ Դրանցից առաջինը գիտության ֆինանսավորման կրճատումն է։ Հիշեցնենք, որ կառավարության 2018-2020 թվականների միջնաժամկետ ծախսերի ծրագրով ՀՆԱ-ից կրթության ոլորտին հատկացվող մասնաբաժինը նվազեցվելու է․ այս տարվա 2,34%-ը 2018-ին կլինի 2,18%,  2019-ին` 1,99%, իսկ 2020-ին` 1.85%։  Իսկ երկրորդը ուսման նպատակով տարկետման իրավունքը վերացնող «Զինծառայության և զինծառայողի կարգավիճակի մասին» օրենքն է։ Հետևաբար, անկախ կազմակերպվող կոնֆերանսների և գիտաժողովների քանակից՝ Հայաստանի կառավարության կողմից գիտության հանդեպ վերաբերմունքը 2017թ․-ին միանշանակ բացասական է եղել։






Կարդացեք նաև։

Սուտ ԱԺ ամբիոնից ակտիվիստների և քաղ. հասարակության մասին

Նոյեմբերի 14-ին, ելույթ ունենալով Ազգային ժողովում, Հանրապետական խմբակցության պատգամավոր Հայկ Բաբուխանյանը հայտարարել է «Սորոսի հիմնադրամից» («Բաց Հասարակության հիմանադրամների») ֆինանսավորվող ՀԿ-ները «փակելու» անհրաժեշտության մասին։ Բաբուխանյանը կազմակերպությանը մեղադրել է տարկետման վերացման դեմ…


Լուսանկարը՝ Հետք.am-ի

Վիգեն Սարգսյանը և Հ1-ը սուտ տեղեկություններով վարկաբեկում են ուսանողներին

Նոյեմբերի 7-ին Հանրային հեռուստաընկերության «Օրակարգ» հաղորդման 21։00-ի թողարկումը նշում է․ «տարկետման իրավունքը սահմանափակող օրենքի դեմ բողոքող ուսանողները պահանջել են հանդիպում կրթական ու պաշտպանական գերատեսչությունների ղեկավարների հետ։ Վիգեն Սարգսյանն ընդունել է…


Քաղաքապետարանը ստում է, Հ1-ը «կուլ է տալիս», իսկ հաշմանդամություն ունեցողները զարմանում են

Նոյեմբերի 3-ին Հանրային հեռուստաընկերության «Մասնագիտությունը՝ լրագրող» հաղորդաշարի լրագրողներն «Ավելի բարեկարգ Երևան» թողարկման շրջանակներում անդրադարձել են Երևանի վերգետնյա և ստորգետնյա անցումներին։ Երևանի քաղաքապետարանի աշխատակազմի կոմունալ տնտեսության վարչության աղբահանության և սանիտարական մաքրման…


Սերժ Սարգսյանի ու ռուսական ռադիոկայանի համատեղ ապատեղեկատվությունը

Սերժ Սարգսյանը հարցազրույց է տվել ռուսական Business FM ռադիոկայանին: Պատասխանելով Հայաստան-Ռուսաստան ներկա հարաբերությունների, ինչպես նաև Եվրասիական տնտեսական միության ինտեգրացիոն քաղաքականության վերաբերյալ հարցերին՝ Սարգսյանը խոսել է նաև այս ամիս Եվրամիության հետ…