Բաբուխանյանը գնահատում է Ղրղզստանի նախագահական ընտրությունները. այլ իրականությունում

17.10.2017 | 23:22

Հոկտեմբերի 15-ին Ղրղզստանում կայացած նախագահական ընտրությունների արդյունքում երկրի նախագահ ընտրվեց նախկին վարչապետ Սոորոնբայ Ժեենբեկովը: Պաշտոնական տվյալների համաձայն՝ քվեների 54,3 տոկոս մեծամասնությամբ հենց 58-ամյա Ժեենբեկովին է բնակչությունը վստահել նախագահական աթոռը: Նա գործող նախագահ Ալմազբեկ Աթամբաևի ղեկավարած սոցիալ-դեմոկրատական կուսակցությունից է,  նրա հետևորդը և համախոհը համարվող քաղաքական գործիչ: Ժեենբեկովը նաև խոստացել է «շարունակել Աթամբաևի ճանապարհը», ով այլևս իրավունք չուներ իր թեկնածությունն առաջադրել այս ընտրություններում:

Ղրղզստանի Ընտրությունների և հանրաքվեների անցկացման կենտրոնական հանձնաժողովի տվյալների համաձայն՝  ընտրություններին մասնակցել են 780 միջազգային դիտորդներ 58 պետություններից: Ընտրություններին հետևել է նաև ԱՊՀ Ժողովրդավարության զարգացման մոնիթորինգի միջազգային ինստիտուտը: Այս դիտորդատկան խմբի կազմում Ղրղզստանի ընտրություններին որպես դիտրոդ ներկայացված է եղել նաև ՀՀ Ազգային ժողովի ՀՀԿ խմբակցության պատգամավոր Հայկ Բաբուխանյանը:

Վերջինս «Սպուտնիկ Ղրղզստան» ռադիոկայանին հարցազրույց է տվել, որում, որպես դիտորդ, տեղի ունեցած ընտրությունները որակել է «ազնիվ և արդար»:

«Կարևորն այն է, որ մարդն իր կամքի արտահայտման և ընտրություններին մասնակցության լիակատար ազատություն ունի: Այդուհանդերձ, ընտրությունները թափանցիկ են, ազնիվ և արդար: Եվ ժողովրդի ընտրությունը բարձրագույն ձգտում է հանդիսանում ամբողջ հասարակության և ինքնին իշխանության համար», – հայտարարել է Բաբուխանյանը ռադիոկայանի եթերում: Բաբուխանյանի մեկնաբանությունը վերահրապարակել է նաև «Սպուտնիկի» հայկական ծառայությունը:

Բանն այն է, որ Բաբուխանյանի «արդար» ու «թափանցիկ»  որակած ընտրություններին, դրանց անցկացումից մեկ օր անց ԵԱՀԿ դիտորդական առաքելությունը բոլորովին այլ գնահատական տվեց:

Համաձայն կառույցի հրապարակած զեկույցի՝ թեև հոկտեմբերի 15-ին կայացած ընտրությունները «ապահովել են կանոնավոր կերպով իշխանության փոխանցումը, սակայն հանրային ռեսուրսների չարաշահումը, ճնշումներն ընտրողների նկատմամբ և քվեների վաճառքը շարունակում են մտահոգիչ մնալ»: Զեկույցում նշված է, որ ընտրությունների տեխնիկական մասը եղել է լավ կազմակերպված, բայց ընտրական վիճաբանությունների վերաբերյալ Ընտրությունների կենտրոնական հանձանաժողովի որոշումները ժամանակ առ ժամանակ ոչ օբյեկտիվ են եղել, մեդիայում ինքնագրաքննությունը և սահմանափակ խմբագրական լուսաբանումն ի ցույց են դրել մամուլի ազատության հարցում առկա թերացումները, բազմաթիվ և էական գործընթացային խնդիրներ են նկատվել ձայների հաշվարկի ընթացքում:

Հետևաբար, Բաբուխանյանի «ազնիվ և արդար» ընտրություններն առավելագույն դեպքում կարող են նրա սուբյեկտիվ և իրականությունն ամբողջությամբ չարտացոլող կարծիքը լինել:

Իսկ ԱՊՀ Ժողովրդավարության զարգացման մոնիթորինգի միջազգային ինստիտուտը, որում ԱԺ պատգամավորը ներկայացրել է Հայաստանը, ԱՊՀ երկրների միջխորհրդարանական ասամբլեայի կառույցներից մեկն է: Չնայած վերոհիշյալ խախտումներին՝ Ղրղզստանի նախագահական ընտրութունների վերաբերյալ ամփոփիչ մամուլի ասուլիսի ընթացքում այս կառույցի դիտորդական առաքելության ղեկավար, ԱՊՀ գործադիր քարտուղար Սերգեյ Լեբեդևը հայտարարել է, որ այդ երկրում նախագահի ընտրություններն «անցել են այլընտրանքային հիմքով, եղել են ազատ, բաց, մրցակցային և թափանցիկ»:

Առհասարակ, ԱՊՀ դիտորդական առաքելությունը նման ձևակերպումներ տալիս է կառույցի անդամ երկրներում կայացող բոլոր ընտրությունների վերաբերյալ: 2015-ի դեկտեմբերի 5-ին Հայաստանում Սահմանադրության փոփոխությունների հանրաքվեից հետո առաքելությունը դրա անցկացումը «ազատ և բաց» էր որակել, մինչդեռ հասարակությունն անձամբ ականատես դարձավ դրա ընթացքում գրանցված բռնություններին, ընտրողների նկատմամբ ճնշումներին ու զանգվածային ընտրախախտումներին:






Կարդացեք նաև։

2016-ին ընտրական օրենսգրքի քննարկումները իրականում և ըստ Արփինե Հովհաննիսյանի (լրացված)

ՀՀ Ազգային Ժողովում հունիսի 7-ին կառավարության ծրագրի քննարկման ժամանակ ելույթ ունեցավ նաև ԱԺ փոխնախագահ, ՀՀԿ քաղաքական խորհրդի անդամ Արփինե Հովհաննիսյանը: Վերջինս իր ելույթում անրադարձավ նաև Ընտրական օրենսգրքի շուրջ ծավալված քննարկումներին…


ՀՀԿ-ն գիտակցված ողջունում է այն, ինչ անիրագործելի է

2018թ. մայիսի 31-ին ՀՀԿ ԳՄ նիստից հետո լրագրողների հետ հանդիպմանը ՀՀԿ գործադիր մարմնի անդամ Դավիթ Հարությունյանը հայտարարեց, որ ՀՀԿ-ն թե Ընտրական օրենսգրքում փոփոխությունների, թե արտահերթ ընտրությունների վերաբերյալ պատրաստ է քննարկումների:…


Ա. Սաղաթելյանը Ս. Սարգսյանի հայտարարությունները թողած՝ Փաշինյանի հոդվածն է աղավաղում

Ազգային ժողովի մայիսի 1-ի հատուկ նիստում, որտեղ քննարկվում էր վարչապետի թեկնածուի ընտրության հարցը, Հանրապետական խմբակցության պատգամավոր Արման Սաղաթելյանը հարց ուղղեց վարչապետի թեկնածու Նիկոլ Փաշինյանին: Արման Սաղաթելյանի հարցը վերաբերում էր Փաշինյանի…


Պաշտոնյաներն ընդդեմ լրագրողների՝ մեկ տեսանյութում

Վերջին տարիներին Հայաստանում պարբերաբար են լինում դեպքեր, երբ պաշտոնյաները տարատեսակ բացասական երևույթների մեջ մեղադրում են լրագրողներին, իսկ երբեմն անգամ բացահայտ թշնամական վերաբերմունք են ցուցաբերում լրագրողների նկատմամբ: SUT.am-ը որոշեց մի տեսանյութում…