Հայկական ԶԼՄ-ները շրջանառում են «Հրապարակի» տարածած ապատեղեկատվությունը

11.10.2017 | 18:30

«Հրապարակ» օրաթերթը հոկտեմբերի 10-ի համարում, ինչպես նաև օրաթերթի կայքէջում հրապարակել է ««Կայֆոտ» տնային հանձնարարություն Սվիտալսկուց» վերնագրով նյութը: Նյութի հեղինակը պնդում է, որ Հայաստանի և Եվրամիության միջև վիզայի ազատականացման նախապայմաններից մեկը մարիխուանայի վաճառքի օրինականացմանն է վերաբերում:

Նախորդ ամիս, խոսելով Հայաստանի հետ վիզային ռեժիմի հնարավոր ազատականացման մասին, Հայաստանում ԵՄ պատվիրակության ղեկավար Պյոտր Սվիտալսկին Հայաստանի իշխանություններին կոչ էր արել ժամանակ չկորցնել և կատարել «տնային աշխատանքը»՝ նախապատրաստվելու միության հետ վիզաների ազատականացմանը: Սվիտալսկին հիշատակել էր Ուկրաինայի, Մոլդովայի և Վրաստանի օրինակները:

Այս հայտարարությունից երկու շաբաթ անց «Հրապարակը» իրեն բնորոշ բառապաշարով «պարզել» է, որ Սվիտալսկին, իբր, նկատի է ունեցել նաև մարիխուանայի օրինականացումը:

«Պարզվում է՝ «տնայիններից» մեկն անչափ «կայֆոտ» է. ԵՄ-ի հետ վիզայի ազատականացման նախապայմաններից մեկն էլ մարիխուանա վաճառելու-«քաշելու» թույլտվությանն է վերաբերում», – գրում է օրաթերթն՝ առանց մանրամասնելու, թե որտեղից է պարզվում և առանց որևէ աղբյուր մատնանշելու:

Առհասարակ «Հրապարակը» հաճախ է աչքի ընկնում չհիմնավորված և ընդգծված չափազանցություններ պարունակող լուրերի տարածմամբ, սակայն այս անգամ հատկանշականն այն է, որ այս լուրն օրաթերթից որպես մամուլի տեսություն վերահրապարակել և տարածել են նաև tert.am, news.am, slaq.am, opertaiv.am, armday.am, shabat.am, armlur.am լրատվականները՝ իրենց հերթին «խիստ ուշագրավ» վերնագրեր հավելելով և տարածելով ապատեղեկատվությունը:

Թմրանյութերի օգտագործման օրինականացումը չի կարող Եվրամիության կողմից որևէ երկրի հետ վիզային ռեժիմի ազատականացման նախապայման լինել: Այն դեպքում, երբ այդ միության անդամներից շատերի տարածքում նույն մարիխուանայի վաճառքն ու կիրառումը ոչ բժշկական նպատակներով առ այսօր անօրինական է համարվում:

Ինչ վերաբերում է Վրաստանի օրինակին, որի մասին հիշատակում է «Հրապարակը»․ Թբիլիսին որոշակի սահմանափակումներով մարիխուանայի կիրառումը դատարանի կողմից օրինական համարեց նախորդ տարվա դեկտեմբերին: Վրաստանում մարիխուանայի օգտագործումն օրինականացվեց տեղի հասարակության երկարատև պայքարի և բողոքի ցույցերի արդյունքում, և օրենքը չի կարելի կապել Եվրամիության հետ վիզայի ազատականացման ռեժիմի հետ:

Իսկ Ուկրաինայում, որը ԵՄ-ի հետ վիզային ազատականացում գործարկած վերջին երկիրն է թմրանյութերի օգտագործումը՝ մարիխուանայի օգատգործումը, ապօրինի է և կանոնակարգվում է Ուկրաինայի քրեական օրենսգրքով: Այս հանգամանքը, ինչպես երևում է չի խանգարում ուկրաինացիներին առանց վիզայի հատել Եվրոպական միության սահմանները:

Թե ի՞նչ կապ ունեն Սվիտալսկու և ԵՄ-Հայաստան վիզայի ազատականացման ռեժիմի հետ «Հրապարակի» նյութում հիշատակված Կալիֆորնիայի հայերը և նրանց բիզնեսները ևս պարզ չէ:






Կարդացեք նաև։

Իսրայելի Քնեսեթում ապատեղեկատվություն է հնչել Հայոց ցեղասպանության ճանաչման մասին

Փետրվարի 14-ին Իսրայելի խորհրդարանը՝ Քնեսեթը, մերժեց Հայոց ցեղասպանության օրը նշելու վերաբերյալ Յեշ Աթիդ կուսակցության ներկայացրած նախագիծը։ Դրա ներկայացումից հետո Իսրայելի փոխարգործնախարար Ցիպի Խոտովելին Քնեսեթի պատգամավորներին ԱԳՆ անունից առաջարկել էր դեմ…


ParaTV-ն աղավաղել է Արևելյան Հայաստանի՝ Ռուսաստանին միանալու պատմությունը

Օրերս, «Պարադիպլոմասի» առցանց հեռուստատեսությունը հրապարակել էր՝ «Ռուս-պարսկական պատերազմները և Արևելյան Հայաստանի ազատագրումը» վերտառությամբ մի հոլովակ: Հոլովակում կան բազմաթիվ վրիպումներ, ակնհայտ սխալներ, իրական փաստերի միտումնավոր բացթողումներ: Եթե անգամ վերանանք այն մանիպուլատիվ…


Ռուսական պրոպագանդան անգամ ռոբոտի մասին սուտ տարածեց

Աշխարհում ամենահայտնի մարդանման կին ռոբոտը՝ Սոֆիան, հայտնվել է ռուսական մամուլի ուշադրության կենտրոնում։ Նշենք, որ այս օրերին շվեյցարական Դավոս քաղաքում ընթացող Համաշխարհային տնտեսական ֆորումին ներկա է նաև Սոֆիան, որը բազմաթիվ հանդիպումների…


Լավրովը ստում է Բուդապեշտի հուշագրի մասին

Ռուսաստանի ԱԳ նախարար Սերգեյ Լավրովն Ուկրաինային մեղադրել է Բուդապեշտի հուշագիրը խախտելու մեջ։ Պատասխանելով լրագրողների հարցրերին` պաշտոնյան հրաժարվել է ընդունել Ռուսաստանի կողմից հուշագրի խախտման հնարավորությունը և հայտարարել, որ Ուկրաինան է այն…