Հայկական ինքնահռչակ համույթը համերգ է տվել ինքնահռչակ Դոնեցկում

27.09.2017 | 12:20

Ինքնահռչակ «Դոնեցկի ժողովրդական հանրապետության», այսպես կոչված, Մշակույթի նախարարությունը պաշտոնական հաղորդագրություն է հրապարակել, համաձայն որի Երևանի «Արարատ» երգի համույթը ելույթ է ունեցել Դոնեցկում:

«Հինգշաբթի՝ սեպտեմբերի 14-ին, Հայաստանի Հանրապետության Երևան քաղաքի «Արարատ» երգի անսամբլը Դոնեցկում տվել է իր առաջին մենահամերգը մարտական գործողությունների մեկնարկից ի վեր», – ասվում է հաղորդագրության մեջ:

Սակայն, թեև անջատողականների հսկողության տակ գտնվող Դոնեցկում համերգ տված «Արարատ» համույթը հայկական է, այն Երևանը չի ներկայացնում: Մշակույթի նախարարությունում տեղյակ չեն ո՛չ համերգի, ո՛չ էլ անգամ վերոհիշյալ համույթի մասին: Խումբը, որի կազմում են մեկ մեներգչուհի և երեք երաժիշտներ, ըստ գերատեսչության հասարակայնության հետ կապերի բաժնի` կարող է «մասնավոր բիզնես» լինել: Այս խումբը նախկինում ևս հաճախ է համերգներով հանդես եկել Դոնեցկում, իսկ դրա մեներգչուհին 2002 թվականին արժանացել է դոնեցկյան «Ոսկե սկիֆ» մրցանակին և Դոնեցկը համարում է իր «հայրենիքի մի մասը»: Համաձայն մամուլի հրապարակումների՝ բարեգործական համերգը կազմակերպել է Դոնեցկի հայկական համայնքը: Համերգին ներկա է եղել մոտ երկու տասնյակ հանդիսատես:

Համույթի՝ Երևանը ներկայացնելու մասին ապատեղեկատվությունը  հրապարակել են ինքնահռչակ հանրապետության տարածքում գործող մի շարք այլ լրատվամիջոցներ ևս, այդ թվում «Նովորոսիա» տեղեկատվական գործակալությունը, Դոնեցկի նորությունների գործակալությունը: Լուրը տեղ է գտել նաև «Դոնեցկի ժողովրդական հանրապետության» պաշտոնական կայքէջում:

Տեղական որոշ լրատվամիջոցները, ինչպես օրինակ «Գորլովսկայա պրավդան», ելույթը ներկայացրել են որպես «Հայաստանի ժողովրդի նվերը Դոնեցկի բնակիչներին», սակայն պաշտոնապես Հայաստանը որևէ առնչություն չունի այս համերգի հետ:

Լուրը հրապարակել են նաև ռուսական որոշ լրատվամիջոցներ, այդ թվում «Կոմսոմոլսկայա պրավդա» պարբերականը: Հայկական լրատվամիջոցներից ապատեղեկատվություն պարունակող լուրը հրապարակել է vesti.am լրատվականը:

«Դոնեցկի Ժողովրդական Հանրապետությունը» անջատողական շարժում է, որը ձևավորվել է 2014 թվականի ապրիլին Ուկրաինայի արևելքում և պաշտոնապես ճանաչված չէ որևէ պետության կողմից:






Կարդացեք նաև։

Ռուսական պրոպագանդան անգամ ռոբոտի մասին սուտ տարածեց

Աշխարհում ամենահայտնի մարդանման կին ռոբոտը՝ Սոֆիան, հայտնվել է ռուսական մամուլի ուշադրության կենտրոնում։ Նշենք, որ այս օրերին շվեյցարական Դավոս քաղաքում ընթացող Համաշխարհային տնտեսական ֆորումին ներկա է նաև Սոֆիան, որը բազմաթիվ հանդիպումների…


Լավրովը ստում է Բուդապեշտի հուշագրի մասին

Ռուսաստանի ԱԳ նախարար Սերգեյ Լավրովն Ուկրաինային մեղադրել է Բուդապեշտի հուշագիրը խախտելու մեջ։ Պատասխանելով լրագրողների հարցրերին` պաշտոնյան հրաժարվել է ընդունել Ռուսաստանի կողմից հուշագրի խախտման հնարավորությունը և հայտարարել, որ Ուկրաինան է այն…


Հայկական ԶԼՄ-ները շրջանառում են «Հրապարակի» տարածած ապատեղեկատվությունը

«Հրապարակ» օրաթերթը հոկտեմբերի 10-ի համարում, ինչպես նաև օրաթերթի կայքէջում հրապարակել է ««Կայֆոտ» տնային հանձնարարություն Սվիտալսկուց» վերնագրով նյութը: Նյութի հեղինակը պնդում է, որ Հայաստանի և Եվրամիության միջև վիզայի ազատականացման նախապայմաններից մեկը…


Ինչպես է աշխատում լրատվական պրոպագանդան

Արդի աշխարհում ամենից թանկ և չբավարարող գործոններից մեկը ժամանակն է։ «Ժամանակս քիչ է», «ժամանակս չի հերիքում» արտահայտությունները դարձել են հասարակության ամենից հաճախ օգտագործվող խոսքերը։ Այս իրականությունից բխում են մի շարք…