Վոլինկինի հայտարարությունը հակասում է փաստերին

13.09.2017 | 13:56

Հայաստանում Ռուսաստանի արտակարգ և լիազոր դեսպան Իվան Վոլինկինը, մեկնաբանելով հայ-չինական ռազմական համագործակցությունը, անդրադարձել է նաև «Ելք» խմբակցության Ազգային ժողով ներկայացրած Հայաստանի ԵԱՏՄ-ից դուրս գալու նախագծին։

Դեսպանի կարծիքով հայաստանցիների մեծամասնությունը չի ցանկանում, որ Հայաստանը լքի ԵԱՏՄ-ն, քանի որ քաղաքացիների մեծամասնությունը տեսնում է Եվրասիական ինտեգրացիայի ակնհայտ առավելությունները։

ԵԱՏՄ-ի ակնհայտ «առավելությունները»

Տնտեսական «առավելությունները»

Հայաստանը ԵԱՏՄ-ին անդամակցում է 3 տարի, այս ընթացքում երկրի ՀՆԱ-ն կրճատվել է 8%-ով, միջազգային պահուստները` 40%-ով, պետական պարտքն աճել է 10%-ով, իսկ զբաղվածության մակարդակը՝ 13%-ով։ Ավելին, ընթացիկ տարում շարունակել է կրճատվել նաև ներդրումների զուտ ներհոսքի ծավալը հենց Ռուսաստանի Դաշնությունից:

Ռազմաքաղաքական «առավելությունները»

Հայաստանի ԵԱՏՄ-ին անդամակցումը երկրի ղեկավարությունը հիմնավորում էր գերազանցապես անվտանգության նկատառումներով՝ նշելով Արցախյան հիմնահարցը։ Վերջինիս համար լավագույն «լակմուսի թուղթ» հանդիսացավ ապրիլյան պատերազմը։ Այդ ժամանակ ցայտուն ընդգծվեց ԵԱՏՄ գործընկերների կողմից իրականացվող ոչ հայանպաստ քաղաքականությունը։

Անդամ պետություններից Ղազախստանը, օրինակ, կարծես ստանձնել է Ադրբեջանի ներկայացուցչի դերը ԵԱՏՄ-ում։ Հիշեցնենք,  2014 թվականի մայիսի 29-ին Աստանայում ԵԱՏՄ գագաթաժողովին նա ընթերցեց Ադրբեջանի նախագահ Իլհամ Ալիևի նամակը։ Նամակը վերաբերում էր Հայաստանի ԵԱՏՄ-ին անդամակցելուն ՄԱԿ-ի կողմից ճանաչված սահմաններով՝ առանց Արցախի։ Ղազախստանի նախագահը նաև ամեն անգամ պատրվակ է գտնում Հայաստան չայցելելու համար։ Օրինակ, 2016 թվականի հոկտեմբերի 14-ին Երևանում կայացած ՀԱՊԿ երևանյան նստաշրջանին Նազարբաևը բացակայում էր «հիվանդության» պատճառով, սակայն, ինչպես ավելի ուշ պարզվեց վերջինս հիվանդ չէր։

ԵԱՏՄ մտնելով՝ անվտանգության հարցը կամ, ինչպես Սերժ Սարգսյանն է հայտարարել, «ղարաբաղյան խնդրի լուծմանը նպաստելու» միֆը, սակայն, ամենից լավ կոտրել և շարունակում է կոտրել Ռուսաստանի Դաշնությունը՝ շարունակելով զինել Ադրբեջանին։

Հայաստանցիների մեծամասնությունը կողմ է ԵԱՏՄ-ին

2016 թվականին «Եվրասիական մոնիտոր» ընկերությունը ԵԱՏՄ անդամ երկրների բնակչության շրջանում հարցում է անցկացրել՝ պարզելու համար այս երկրներում մարդկանց վերաբերմունքը ԵԱՏՄ-ի նկատմամբ ։ Անդամ 4 երկրներում բնակչության մեծամասնության վերաբերմունքն, ընդհանուր առմամբ, դրական է։ Պատկերը, սակայն, էական տարբերվում է Հայաստանում։

Հարցման համաձայն՝ հայաստանյան հասարակության 61 տոկոսը 2012թ.-ին կողմ է եղել ԵԱՏՄ-ին, անտարբեր են եղել 26 տոկոսը, իսկ դեմ՝ ընդամենը 3 տոկոսը։ 2015 թվականին, երբ Հայաստանը պաշտոնապես սկսեց անդամակցել ԵԱՏՄ-ին, այս կառույցին կողմ արտահայտվողների թիվը նվազեց՝ հասնելով 56 տոկոսի, անտարբեր են արտահայտվել հայերի 29 տոկոսը, դեմ՝ 10 տոկոսը։

2016թ.-ին ԵԱՏՄ-ին կողմ արտահայտվող քաղաքացիների թիվն էլ ավելի է նվազել՝ կազմելով 46 տոկոս։ Մեծացել է անտարբեր և դեմ արտահայտվող հայերի թիվը՝ համապատասխանաբար 33 և 15 տոկոս։

Այսպիսով, Հայաստանը ԵԱՏՄ անդամ երկրների թվում միակն է, որի բնակչության կեսից պակասն է ողջունում այդ միությունը:






Կարդացեք նաև։

Ծուխ հեռուստադիտողների աչքերին Հանրայինի եթերից

Մարտի 31-ին «Քաղաքացիական պայմանագիր» կուսակցության մեկնարկած «Իմ քայլը» նախաձեռնությունը հայաստանյան համապետական սփռում ունեցող գրեթե բոլոր հեռուստաընկերությունների լրատվական թողարկումները խուսափում են լուսաբանել։ Շարժման իրականցրած ակցիաները չի լուսաբանում նաև Հանրային հեռուստաընկերությունը։ Դրա…


Պուտինի խոստումները և իրականությունը ՌԴ տնտեսության հզորացման մասին

Ինչպես հայտնի է, կիրակի Ռուսաստանում տեղի ունեցած նախագահական ընտրություններում չորրորդ անգամ հաղթեց գործող նախագահ Վլադիմիր Պուտինը: Նա հավաքեց ռեկորդային՝ մոտ 76% քվե։ 18 տարի իշխանության ղեկին լինելով՝  Պուտինը բազմիցս տնտեսական…


Պուտինի հրթիռները 2007թ.-ին էլ էին «նորագույն զենք»

Կրեմլյան ապատեղեկատվության դեմ պայքարող EU vs Disinformation-ը անդրադարձ է կատարել ռուսական մեդիայում նախագահ Պուտինի` մարտի 1-ին ՌԴ Դաշնային խորհրդին ուղղված իր ուղերձում կատարած հայտարարությունների լուսաբանմանը։ Համաձայն կայքի, ռուսական փաստերի ստուգմամբ…


Ապատեղեկատվություններ և բռնության արդարացում Արմենիա TV-ի եթերում

Փետրվարի 18-ին «Արմենիա» հեռուստաընկերության «Բանաձև ակումբ» հաղորդաշարի 16-րդ թողարկմանը քննարկվել է Երևանի քաղաքապետարանում ավագանու «Երկիր Ծիրան»ի և Հանրապետական խմբակցությունների անդամների միջև տեղի ունեցած ծեծկռտուքը։ Հաղորդմանը հրավիրվել էին «Ելք» խմբակցության ղեկավար…