ՀՅԴ-ում քառօրյա պատերազմը հաղթել են, այն էլ ռուսական ռեսուրսով

12.09.2017 | 17:08

Ազգային ժողովում ՀՅԴ խմբակցության ղեկավար Արմեն Ռուստամյանը լրագրողներին տված հարցազրույցում հայտարարել է, որ քառօրյա պատերազմում Հայաստանը հաղթել է ռուսական ռեսուրսի շնորհիվ:

Մեկնաբանելով «Ելք» խմբակցության ներկայացրած, ԵԱՏՄ-ից Հայաստանի դուրս գալու օրենսդրական նախաձեռնության նախագիծը, Ռուստամյանը հայտարարել է, որ իր խմբակցությունն այդ նախագծին դեմ է քվեարկելու, քանի որ Հայաստանն «այս պահին անվտանգության ապահովման այլընտրանք չունի»: Հարցին, թե ինչո՞վ է  ԵԱՏՄ անդամակցությունը նպաստել Հայաստանի անվտանգության ապահովմանը՝ դաշնակցական պատգամավորը Ապրիլյան պատերազմում «Հայաստանի հաղթանակը» պայմանավորել է երկրի՝ Եվրասիական տնտեսական միության անդամ լինելու հանգամանքով:

«Բա պա՞րզ չի, որ [մեր անվտանգության դիրքերն] ամրապնդվել են: Նրանով, որ մենք պատերազմ ենք հաղթել՝ բոլորովին վերջերս մեզ պարտադրված Ադրբեջանի կողմից: Փաստը մնում է փաստ, չէ՞, թե մենք ինչ ռեսուրսով ենք հաղթել, դա ակնհայտ փաստ է, չէ՞», ասել է Ռուստամյանը:

Լրագրողներից մեկի ճշտող հարցին, թե արդյո՞ք նկատի ունի ռուսական ռեսուրսը, դաշնակցական պատգամավորը պատասխանել է.

«Բա ինչո՞վ են կռվել մեր հայ զինվորները: Դուք տեղյակ չեք պարզապես: Դուք երևի տեղյակ չեք ինչ է նշանակում պաշտպանություն ասածը: Պաշտպանությունն ամբողջական համալիր է: Ոչ միայն մարդիկ են էդտեղ կարևոր, իհարկե, առաջնայինը հենց իրենք են, բայց զենք-զինամթերքի, անհրաժեշտ տեխնիկա ունենալու խնդիր պիտի ունենաս, ռեսուրս պիտի ունենաս, սրա մասին է խոսքը»:

Ռուստամյանի հարցազրույցում, սակայն, լսարանին շփոթության մեջ գցող և ապատեղեկատվություն պարունակող հայտարարություններ կան:

Ռեսուրսը, որը Հայաստանն օգտագործել է 2016-ի ապրիլին ռուսական չէ, այն ռուսական արտադրության է, սակայն գնված է Ռուսաստանից և չի կարող դիտարկվել որպես «ռուսական ռեսուրս»: Դրա համար Հայաստանը վճարել է Ռուսաստանին: Նույնքան կարևոր է հանգամանքը, թե ինչ ռեսուրս է օգտագործել այդ պատերազմում Ադրբեջանը Հայաստանի դեմ: Հայտնի է, որ ադրբեջանական բանակի սպառազինության 85%-ը ռուսական արտադրության է, և Ռուսաստանը սպառազինել և շարունակում է սպառազինել Ադրբեջանին: Այսինքն, Ռուստամյանի տրամաբանությամբ Հայաստանի դեմ ևս օգտագործվել է հենց «ռուսական ռեսուրսը»:

Իսկ քառօրյա պատերազմում ռազմավարական նշանակության դիրքերի և 800 հա տարածքի կորստից, մարդկային մի քանի տասնյակ զոհերի գրանցմամբ իրադարձությունների ելքը որպես հաղթանակ ներկայացնելը մինաշանակ չի կարող դիտարկվել, առավել մինաշանակ չէ ԵԱՏՄ-ի դերը 2016-ի ապրիլի իրադարձությունների զարգացման համատեքստում: Ընդհակառակը, հենց այդ պատերազմը հերթական անգամ փլուզեց Հայաստանի՝ ԵԱՏՄ կազմում անվտանգության երաշխիքներ ունենալու առասպելը՝ ակնհայտ դարձնելով ԵԱՏՄ անդամ երկրների անտարբերությունը միության անդամ հանդիսացող Հայաստանի նկատմամբ:






Կարդացեք նաև։

Կամ Վիգեն Սարգսյանը ստում է, կամ ՀՀ բնակչությունը 2 միլիոն է

Ամիսներ առաջ ՀՀ Պաշտպանության նախարար Վիգեն Սարգսյանը հանրային խորհրդի անդամների հետ հանդիպման ընթացքում ներկայացնում էր «Պատիվ ունեմ» և «Ես եմ» երկու պայմանական ծրագրերը՝ որպես «ազգ-բանակի» կոնցեպտի բաղադրիչներ: Քննարկման ընթացքում պաշտպանության…


Ռուսալեզու որոշ ԶԼՄ-ներ ապատեղեկատվություն են տարածում Հայաստանի՝ ԵԱՏՄ-ից դուրս գալու նախագծի քննարկման վերաբերյալ

Սեպտեմբերի 27-ին ԱԺ Արտաքին հարաբերությունների մշտական հանձանժողովը բացասական եզրակացություն տվեց  նախագծին, որը նախատեսում էր ԵԱՏՄ-ին Հայաստանի անդամակցության օգուտները և վնասները ուսումնասիրելու համար ժամանակավոր հանձնաժողով ստեղծել: Ազգային ժողովի «Ելք» խմբակցության առաջարկած…


Regnum-ի վերլուծությունն աղավաղում է Նալբանդյանի խոսքը

Ռուսական Regnum լրատվական գործակալությունը, անդրադառնալով Հայաստանի ԱԳ նախարար Ն․Գ․ պարոն Էդվարդ Նալբանդյանի «Հայաստան-Սփյուռք» համաժողովին Ղարաբաղյան հիմնահարցին վերաբերող հայտարարությանը, հրապարակել է «Լեռնային Ղարաբաղի տարածքների Ադրբեջանին փոխանցելու ռազմական հետևանքները» վերնագրով վերլուծություն, որի…


ԵԱՏՄ-ի օգուտների մասին Վարդան Արամյանի հոդվածի 3 սխալները (կամ ստերը)

Ինչպես հայտնի է, վերջերս ՀՀ ԱԺ «Ելք» խմբակցությունը հանդես է եկել Հայաստանի Հանրապետության կողմից Եվրասիական տնտեսական միությունը լքելու վերաբերյալ օրենսդրական նախաձեռնությամբ, ինչի հետևանքով ՀՀ հասարակական և քաղաքական շրջանակներում ակտիվացել են…