«Պարտադիր-կամավոր» շաբաթօրյակ Երևանում

01.08.2017 | 12:11

Հուլիսի 29-ին Երևանի քաղաքապետարանի նախաձեռնությամբ մայրաքաղաքում կազմակերպվեց համաքաղաքային շաբաթօրյակ: Շաբաթօրյակից օրեր առաջ կայացած աշխատանքային խորհրդակցության ընթացքում քաղաքապետ Տարոն Մարգարյանը հանձնարարել էր ապահովել իր ղեկավարած կառույցի և քաղաքապետարանին ենթարկվող կազմակերպությունների աշխատակիցների ներկայությունը համաքաղաքային միջոցառմանը:

«Քաղաքապետը հանձնարարել է ևս մեկ անգամ իրազեկել և ապահովել քաղաքապետարանի աշխատակազմի, ենթակայության ներքո գտնվող կազմակերպությունների, ինչպես նաև մեր համաքաղաքացիների և շահագրգիռ բոլոր կառույցների ակտիվ մասնակցությունը համաքաղաքային այս միջոցառմանը»,- ասվում է Երևանի քաղաքապետարանի տարածած պաշտոնական հաղորդագրության մեջ:

Սակայն, Մարգարյանն իր հայտարարության մեջ հիշատակած այն «սրտացավ երևանցիների» շարքում չէր, ում անձամբ կոչ էր արել ներկա լինել շաբաթօրյակին: Տարոն Մարգարյանի համաքաղաքային շաբաթօրյակից բացակայության վերաբերյալ դիտարկմանն ի պատասխան քաղաքապետարանի Տեղեկատվության և հասարակայնության հետ կապերի վարչությունից հայտնեցին, որ «քաղաքապետի մասնակցությունը որևէ ձևով պարտադիր չէ»:

Իսկապես, ՀՀ Սահմանադրության 57-րդ հոդվածի 5-րդ կետի համաձայն՝ որևէ աշխատանք պարտադիր կամ հարկադիր չի կարող լինել: Սակայն Սահմանադրության այս արգելքը պետք է տարածվեր նաև այն անձանց վրա, ում «մասնակցությունն ապահովվել է» քաղաքի մաքրման աշխատանքներին:

Պաշտոնական հաղորդագրության համաձայն հուլիսի 29-ի շաբաթօրյակին 14550 մարդ է մասնակցել: Այդ թվում են  Երևանի քաղաքապետարանի աշխատակազմի, վարչական շրջանների աշխատակազմերի, քաղաքապետարանի ենթակայության կառույցների, պետական ու մասնավոր կազմակերպությունների աշխատակիցներ, կրթօջախների և հասարակական կազմակերպությունների ներկայացուցիչներ:

«Բոլորը կամավոր մասնակցել են», – մեզ հետ հեռախոսազրույցում ասաց քաղաքապետարանի հասարակայնության հետ կապերի վարչության պետ Արթուր Գրիգորյանը:

Այսինքն, քաղաքապետարանի տրամաբանության հաջորդականությունն այսպիսին է` նախ պահանջում են ապահովել բոլորի մասնակցությունը, հետո «ի պաշտոնե» բոլորը «կամավոր» մասնակցում են միջոցառմանը, իսկ կոչեր անող Տարոն Մարգարյանը ո´չ «ի պաշտոնե», ո´չ էլ «կամավոր» շաբաթօրյակի մասնակիցների շարքում չէր:

Հիշեցնենք նաև, որ այդ օրը Երևանում 5 ժամ շարունակ եղել է +40-ից +41 աստիճան տաքություն և շատ դժվար է պատկերացնել, որ 14550  մարդ կամավոր դուրս է եկել արևի տակ աշխատելու։






Կարդացեք նաև։

Համացանցում տարածվում են ԲՀԿ-ի մասին կեղծ տեսանյութեր

Հեղափոխությունից հետո համացանցում կեղծ օգտատերերի և լրատվական էջերի կտրուկ աճ արձանագրվեց։ Դրանք մեծամասամբ կրում են լրատվական և/կամ քաղաքական բնույթ։ Վերջիններս որևէ կերպ սահմանափակված չեն ո՛չ ԶԼՄ-ների մասին օրենքով և ո՛չ…


SUT.am-ի հետաքննության արդյունքում չեղարկվել են 103 մլն դրամի անօրինական պայմանագրեր

Ամիսներ առաջ անդրադարձանք Երևանի քաղաքապետարանի կատարած բյուջետային գնումներից մեկին։ Պարզվել էր՝ քաղաքապետարանը, գնման ընթացակարգերը չպահպանելով և խախտելով, միլիոնավոր դրամների պայմանագրեր է կնքել։ Այսպես, քաղաքապետարանը մայրաքաղաքի թվով 5 մանկապարտեզների վերանորոգման նպատակով…


«Կենտրոն»-ի մանիպուլյացիան՝ ավագանու ընտրությունների մասին

Ընտրական քարոզարշավի շրջանակներում «Կենտրոն» հեռուսատընկերության ռեպորտաժներից մեկում լրագրողը ներկայացրեց «Գելափ ինթերնեյշնըլ ասոցիացիա»-ի հարցումների արդյունքները։ Դրանք վերաբերում էին Երևանի ավագանու ընտրություններին։ Հատկանշանական է, թե ինչպես են մեկնաբանվում հարցման արդյունքները հեռուստաընկերության և…


Ապատեղեկատվություն՝ Դանիել Իոաննիսյանի մասին

Ֆեյսբուքի հայաստանյան տիրույթում վերջին ամիսներին գրանցվել են բազմաթիվ նոր սոցիալական էջեր։ Դրանք մեծամասամբ կրում են ոչ թե ժամանցային, այլ քարոզչական բնույթ։ Հայտնվել են «ԱԱԾ», «Ոստիկանություն», «ՀՔԾ» և այլ պետական կառույցների…