«Միր»-ը կեղծել է Թբիլիսիի շոգից բողոքող երիտասարդի պահանջը

27.07.2017 | 10:30

ԱՊՀ երկրների համար միջպետական նշանակություն ունեցող ռուսալեզու «Միր» հեռուստաընկերությունը, որի ֆինանսավորումը գոյանում է նաև ՀՀ հարկատուների հաշվին, կեղծ հեռուստառեպորտաժ է հեռարձակել Վրաստանի կոմունալ ծառայությունների առաջացրած խնդիրների մասին` խեղաթյուրելով իրականությունը:

Օգտագործելով համացանցում օրերս հայտնված փերֆորմանսային տեսանյութը, որտեղ մի վրացի երիտասարդ լոգանք է ընդունում Թբիլիսիի փողոցներից մեկում տեղադրված լոգարանում` «Միր» հեռուստաընկերության լրագրողները պատմել են Թբիլիսիի կենտրոնական թաղամասերում օրեր շարունակ ջրամատակարարման և էլեկտրամատակարարման բացակայության մասին:

«Երիտասարդն անմիջապես Ռուսթավելիի պողոտայում լոգարան է տեղադրել` ջրով լցնելով այն մոտակա աղբյուրից և առանց ամոթի լոգանք է ընդունել անմիջապես անցորդների աչքի առջև: Պահվածքը բացատրել է շատ պարզ` կոմունալ ծառայությունների աշխատակիցներն այլընտրանք չեն թողել: Երրորդ օրն է նրա տանը ո՛չ ջուր կա, ո՛չ լույս», – ասվում է ռեպորտաժի մեկնաբանության մեջ` հայտնելով, որ երիտասարդը նման կերպ իր բողոքն է հայտնում:

«Շոգում եմ, տանը +35 աստիճան է, օդորակիչը չեմ կարող միացնել էլեկտրաէներգիայի բացակայության պատճառով», հեռուստաընկերությունը ռուսերեն է թարգմանել երիտասարդի խոսքերը:

Մինչդեռ, իրականում, տեսանյութում վրացի երիտասարդը բոլորովին այլ բան է ասում: Ընդամենը մի քանի վայրկյան տևած լրագրողի և երիտասարդի երկխոսության իրական թարգմանության և «Միր»-ի ներկայացրած թարգմանության միջև դժվար է ընդհանուր բան գտնել.

-Փորձո՞ւմ եք հովանալ նման կերպ
-Ներողություն..
-Փորձո՞ւմ եք հովանալ
-Այո՛, լոգարանում ջուրն արդեն տաքացել է, պետք է սառն ավելացնեմ ու կրկին պառկեմ: Շնորհակալություն:

Ինչպես երևում է, որևէ խոսք էլեկտրաէներգիայի կամ նման կերպ իշխանություններին բողոք հայտնելու մասին այս տեսանյութում չկա: Փաստացի, ԱՊՀ երկրների համար և այդ երկրների հարկատուների հաշվին գոյացած միջոցներով հեռարձակվող այս հեռուստաընկերությունը ակնհայտ կեղծ լուրեր է տարածում այդ միավորման անդամ չհանդիսացող Վրաստանի մասին:

Ի դեպ, թեև «Միր»-ը հեռարձակվում է հետխորհրդային 13 երկրներում, սակայն այն պարտադիր համապետական հեռարձակում ունի միայն ԵԱՏՄ անդամ երկրներում` Հայաստանում, Ռուսաստանում, Ղազախստանում, Բելառուսում և Ղրղզստանում:






Կարդացեք նաև։

Ատոմակայանի փակվելը կախված չէ ԵՄ-Հայաստան համաձայնագրից

Օրերս հրապարակվեց Հայաստանի և ԵՄ–ի միջև ստորագրվելիք շրջանակային համաձայնագրի տեքստը, որը բուռն քննարկման (նաև քննադատության) առիթ դարձավ։ Համաձայնագրի 386 կետերից ուշադրության կենտրոնում հայտնվեց թերևս մեկը՝  Մեծամորի ատոմակայանին վերաբերողը։ Բարձրագոչ հայտարարություններվ…


Հայկական ԶԼՄ-ները շրջանառում են «Հրապարակի» տարածած ապատեղեկատվությունը

«Հրապարակ» օրաթերթը հոկտեմբերի 10-ի համարում, ինչպես նաև օրաթերթի կայքէջում հրապարակել է ««Կայֆոտ» տնային հանձնարարություն Սվիտալսկուց» վերնագրով նյութը: Նյութի հեղինակը պնդում է, որ Հայաստանի և Եվրամիության միջև վիզայի ազատականացման նախապայմաններից մեկը…


Ռուսալեզու որոշ ԶԼՄ-ներ ապատեղեկատվություն են տարածում Հայաստանի՝ ԵԱՏՄ-ից դուրս գալու նախագծի քննարկման վերաբերյալ

Սեպտեմբերի 27-ին ԱԺ Արտաքին հարաբերությունների մշտական հանձանժողովը բացասական եզրակացություն տվեց  նախագծին, որը նախատեսում էր ԵԱՏՄ-ին Հայաստանի անդամակցության օգուտները և վնասները ուսումնասիրելու համար ժամանակավոր հանձնաժողով ստեղծել: Ազգային ժողովի «Ելք» խմբակցության առաջարկած…


Վրացական կողմը սուտ է հանում ՀՀ պաշտոնյաներին

Վրաստանի պաշտպանության նախարարությունը պաշտոնապես հայտարարել է, որ Հայաստանը դեռևս հուլիսին հաստատել է իր մասնակցությունն Agile Spirit 2017 զորավարժություններին: Մասնավորապես, Վրաստանի պաշտպանության նախարար Լևան Իզորիան «Ազատություն» ռ/կ հարցմանն ի պատասխան հայտնել…