Շարմազանովի սուտը ռուսական զենքի վնասի մասին

20.07.2017 | 16:16

Այսօր Ազգային ժողովի փոխխոսնակ և Հանրապետական կուսակցության խոսնակ Էդուարդ Շարմազանովը, հղում անելով նախագահ Սերժ Սարգսյանին, հայտարարեց, որ «կարող ենք մեղադրել (Ռուսաստանին – խմբ.) այն ժամանակ, երբ ռուսական զենքը, որը մատակարարվել է Ադրբեջանին, ուղիղ վնաս է հասցնում մեզ»: Ըստ էության, Շարմազանովն այսպես փորձել է ներկայացնել, թե Ադրբեջանին մատակարարված ռուսական զենքը մեզ ուղիղ վնաս չի հասցրել: Այնինչ իրականությունը հակառակն է:

Մի-24 ուղղաթիռը

Տարիներ շարունակ Ռուսաստանը Ադրբեջանին մատակարարել է տարատեսակ զենքեր և զինամթերքներ: Հայկական բանակի զինվորների ուղղությամբ համարյա ամեն օր արձակվում էին ռուսական արտադրության փամփուշտներ և այլ զինամթերքներ, որոնք չեն համարվում «կոնվենցիոն» (խոսքը Եվրոպայում սովորական զինված ուժերի կոնվենցիայի մասին է) և որոնց վաճառքը չի արձանագրվում միջազգային ատյանների կողմից:

Ռուսաստանը Ադրբեջանին 2012-ից 2013 թվականներին մատակարարել էր 1000 հատ  «Իգլա-Ս» տեսակի հրթիռ՝ 200 արձակման կայաններով:

2014 թվականի նոյեմբերի 12-ին Արցախի արևելյան հատվածում ուսումնավարժական թռիչքի ժամանակ ադրբեջանական զինված ուժերի կողմից Ռուսաստանից «թարմ-թարմ» ստացած «Իգլա-Ս» տեսակի հրթիռով խոցվեց հայկական օդուժի Մի-24 հարվածային ուղղաթիռը, որի անձնակազմի 3 անդամները զոհվեցին:

Ապրիլյան պատերազմ

Վերջին տարիներին Ռուսաստանը Ադրբեջանին մատակարարել է 100 հատ T-90s տեսակի հիմնական մարտական տանկեր, հետևակին կենդանի այրելու համար ստեղծված 18 հատ «Սոլնցեպյոկ» համազարկային հրանետներ, հազարից ավելի հակատանկային հրթիռներ, 24 գրոհային ուղղաթիռներ, 18 հատ համազարկային կրակի «Սմերչ» համակարգեր և ինքնագնաց հրետանու այլ տեսակներ, որոնք բոլորը կիրառվել են 2016 թվականի ապրիլյան պատերազմում:

Ապրիլյան պատերազմը սկսվեց Ռուսաստանից 2011-ից 2014 թվականներին մատակարարված Մի-35Մ գրոհային ուղղաթիռների հարձակմամբ (որը հետ մղվեց):

Այնուհետև տեխնիկայից մարտի մեջ նետվեցին ամեն տեսակի հրետանային համակարգերը, որոնց թվում էին 2012 թվականից հետո մատակարարված ռուսական ինքնագնաց հրետանային համակարգերը:

Մարտերից անմասն չմնացին նաև 2013-ից 2014 թվականներին մատակարարված T-90s տանկերը: Այդպես, օրինակ տանկային լայնամասշտաբ հարձակման փորձ եղավ Աղդամի ուղղությամբ (որը կանխվեց հրետանու աշխատանքի շնորհիվ):

Ադրբեջանական կողմը՝ այդ թվում նաև ռուսական «Բաստիոն» (մասամբ նաև իսրայելական «Սպայկ») հակատանկային համակարգերով, խոցեց 14 հայկական տանկ, իսկ ապրիլի 4-ի կեսօրին Թալիշ գյուղի հատվածում Ադրբեջանը կիրառեց նաև ռուսական ՏՕՍ-1Ա «Սոլնցեպյոկ» հրանետները:

Այնուհետև, ապրիլի 4-ի լույս 5-ի գիշերը ադրբեջանական կողմը նաև կիրառեց «Սմերչ» համազարկային կրակի համակարգերը՝ Դուբլինյան կոնվենցիայով արգելված կասետային մարտագլխիկներով հրթիռներով (որոնք մատակարարվել էին 2012-2014 թվականներին):

Եթե չզինեին

Այսպիսով, ադրբեջանական կողմի գերակշռապես ռուսական զենքերով իրականացված ագրեսիայի արդյունքում հայկական կողմը կրեց շուրջ 100 զոհ, կորցրեց 800 հեկտար տարածք:

Եվ, առհասարակ, կարելի է պնդել, որ ապրիլյան պատերազմը չէր էլ լինի, եթե Ռուսաստանը, բազմաթիվ այլ երկրների նման հրաժարվեր զինել Ադրբեջանին (ինչի մասին ԵԱՀԿ Մինսկի խմբի անդամ երկրները պայմանավորվել էին 1994 թվականին Բուդապեշտում):

Հետևապես, Էդուարդ Շարմազանովի պնդումը ռուսական զենքերից մեզ հասցված վնասի վերաբերյալ սուտ է: Այսկերպ Շարմազանովը միացավ Սերժ Սարգսյանին և Դավիթ Բաբայանին, ովքեր ևս վերջին մի քանի օրում սուտ հայտարարություններ արեցին Բաքվին մատակարարվող ռուսական զենքի շուրջ:






Կարդացեք նաև։

Սարգսյանի ինքնաբացառման սուտը՝ ՀՀԿ-ականների կատարմամբ (տեսանյութ)

Շուրջ 4 տարի առաջ սահմանադրական բարեփոխումների մասնագիտական հանձնաժողովի անդամների հետ հանդիպման ժամանակ Սերժ Սարգսյանը երաշխիքներ տվեց հանձնաժողովականներին, որ վերջիններս Սահմանադրության նոր նախագիծը գրելիս անկախ գործեն: Որպես գլխավոր երաշխիք՝ Սարգսյանը վստահեցրեց,…


Ժողովրդավարությունն` ըստ Էդուարդ Շարմազանովի և իրականում

Մարտի 29-ին ՀՀԿ գործադիր մարմնի նիստից հետո ԱԺ փոխնախագահ, ՀՀԿ խոսնակ Էդուարդ Շարմազանովը մեկնաբանել էր «Ելք» խմբակցության ղեկավար Նիկոլ Փաշինյանի հայտարությունը առ այն, որ եթե Սերժ Սարգսյանի վարչապետության դեմ պայքարի…


Նախիջևանից 20.000 հեկտար «վերցնելու» մասին ՀՀԿ-ականի մանիպուլյացիան

Հանրապետական կուսակցության պատգամավոր Միհրան Հակոբյանը «Հրապարակ» օրաթերթին տված հարցազրույցում աղմկահարույց հայտարարություն է արել։ Պատասխանելով լրագրողի այն պնդմանը, որ հենց Սերժ Սարգսյանի գերագույն հրամանատարության ժամանակ տեղի ունեցավ ապրիլյան պատերազմը, որտեղ հայկական…


Ռուսական ընտրություններն ըստ Շարմազանովի և իրականում

Հայաստանի Ազգային ժողովի փոխնախագահ Էդուարդ Շարմազանովը, որպես ՀԱՊԿ խորհրդարանական վեհաժողովի դիտորդական առաքելության ղեկավար, դիտարկել է նախօրեին Ռուսաստանում տեղի ունեցած նախագահական ընտրությունները և արել իրականությանը չհամապատասխանող հայտարարություններ: Ռուսական ՌԻԱ գործակալությանը տված…