Սերժ Սարգսյանի Ռ-«էվոլյուցիա» չապրող սուտը

19.07.2017 | 17:01

Հուլիսի 16-ին «Արմենիա» հեռուտաընկերության «Ռ-Էվոլյուցիա» հաղորդմանը տված հարցազրույցում Սերժ Սարգսյանը Ադրբեջանին Ռուսաստանի կողմից զենք վաճառելու կապակցությամբ ՌԴ-ի դիրորքոշման վերաբերյալ հարցին պատասխանել է, որ երբևէ չի լսել ՌԴ նախագահի կամ արտաքին գործերի նախարարի դիրքորոշումը այդ գործարքների մասին, որպեսզի մեկնաբանի դրանք:

«Ես երբևէ չեմ լսել ռուսական կողմի պատասխանը, գոնե հրապարակավ, և եթե մի ռուս քաղաքական գործիչ կամ վերլուծաբան, կամ նույնիսկ ինչոր մի պաշտոնյա ինչոր բաներ է ասում, դա չի նշանակում, որ դա ռուսական կողմի պատասխանն է: Ռուսական կողմը կարող է պատասխանել նախագահի շուրթերով, արտաքին գործերի նախարարի շուրթերով», ասել է Սարգսյանը` հրաժարվելով մեկնաբանել ՌԴ դիրքորոշումը:

Թե՛ «գոնե հրապարակավ», թե՛ «նախագահի շուրթերից» Սերժ Սարգսյանը ռուսական կողմի պատասխանը, սակայն, լսել էր ոչ վաղ անցյալում` 2016 թվականի օգոստոսի 10-ին, երբ աշխատանքային այցով գտնվում էր Մոսկվայում: Սարգսյան-Պուտին հանդիպումից հետո երկու պաշտոնյաները համատեղ մամուլի ասուլիս էին տվել, որում Պուտինը, պատասխանելով հայկական հեռուստաընկերություններից մեկի լրագրողի հարցին, իր դիրքորոշումն էր հայտնել Ադրբեջանին զենք վաճառելու վերաբերյալ:

«Սպառազինության ժամանակակից շուկայում ցանկացած երկիր գործնականում կարող է գնել ցանկացած զենք և, ասենք, այնպիսի երկիր, ինչպիսին Ադրբեջանն է` նավթարդյունահանող երկիր, մոտ 10 միլիոն բնակչություն ունեցող երկիր, արագ աճող տնտեսությամբ, ոսկեարժութային պահուստների բավական ծավալով, իհարկե, ի վիճակի է սպառազինություն գնել որտեղ պատահի: Հասկանո՞ւմ եք, որտեղ պատահի», – ասել էր Պուտինը` Սարգսյանի ներկայությամբ:

Այս խնդրի վերաբերյալ Պուտինի հետ քննարկման մասին Սերժ Սարգսյանն անձամբ ևս հայտարարել էր ավելի վաղ: 2015 թվականի ապրիլին Ռուսաստանի «Առաջին ալիքով» Վլադիմիր Պոզներին տված հարցազրույցում Սարգսյանը հայտարարել էր, որ Ադրբեջանին ռուսական զենքի վաճառքի մասին բազմիցս խոսել է ռուսաստանցի իր գործընկերոջ հետ:

«Մենք բազմաթիվ անգամներ ենք Վլադիմիր Վլադիմիրովիչի հետ խոսել այս թեմայով.․․ մենք չէինք կարող չխոսել», – ասել էր Սարգսյանը:

Ստացվում է, որ Սարգսյանը ստել է «հայ-ռուսական բարեկամության ամենացավալի կողմի» մասին:






Կարդացեք նաև։

Սարգսյանի ինքնաբացառման սուտը՝ ՀՀԿ-ականների կատարմամբ (տեսանյութ)

Շուրջ 4 տարի առաջ սահմանադրական բարեփոխումների մասնագիտական հանձնաժողովի անդամների հետ հանդիպման ժամանակ Սերժ Սարգսյանը երաշխիքներ տվեց հանձնաժողովականներին, որ վերջիններս Սահմանադրության նոր նախագիծը գրելիս անկախ գործեն: Որպես գլխավոր երաշխիք՝ Սարգսյանը վստահեցրեց,…


Նախիջևանից 20.000 հեկտար «վերցնելու» մասին ՀՀԿ-ականի մանիպուլյացիան

Հանրապետական կուսակցության պատգամավոր Միհրան Հակոբյանը «Հրապարակ» օրաթերթին տված հարցազրույցում աղմկահարույց հայտարարություն է արել։ Պատասխանելով լրագրողի այն պնդմանը, որ հենց Սերժ Սարգսյանի գերագույն հրամանատարության ժամանակ տեղի ունեցավ ապրիլյան պատերազմը, որտեղ հայկական…


Պուտինի խոստումները և իրականությունը ՌԴ տնտեսության հզորացման մասին

Ինչպես հայտնի է, կիրակի Ռուսաստանում տեղի ունեցած նախագահական ընտրություններում չորրորդ անգամ հաղթեց գործող նախագահ Վլադիմիր Պուտինը: Նա հավաքեց ռեկորդային՝ մոտ 76% քվե։ 18 տարի իշխանության ղեկին լինելով՝  Պուտինը բազմիցս տնտեսական…


Հայաստանյան TV-ները միակողմանի են լուսաբանել ՌԴ ընտրությունները

Մարտի 18-ին կայացած ՌԴ նախագահի ընտրություններում վերընտրվեց գործող նախագահ Վլադիմիր Պուտինը՝ հավաքելով քվեների մոտ 76 տոկոսը։          Պատմելով Վլադիմիր Պուտինի ընտրություններում գրանցած հաղթանակի մասին՝ հայաստանյան հեռուստաընկերությունները միակողմանի են լուսաբանել այդ…