«Շանթ»-ով և Հ1-ով ստում են ԵԱՀԿ/ԺՀՄԻԳ-ի զեկույցի մասին

13.07.2017 | 11:35

Հուլիսի 10-ին ԵԱՀԿ/ԺՀՄԻԳ-ը հրապարակեց ապրիլի 2-ին կայացած ՀՀ խորհրդարանական ընտրությունների դիտորդական առաքելության վերջնական զեկույցը: Զեկույցը հուլիսի 11-ին լուսաբանվեց Հ1 և Շանթ հեռուստաալիքների հիմնական լուրերի թողարկումներում` Հ1 Օրակարգի 21։00 եթերում և Շանթի Հորիզոնի 22։00 թողարկման ընթացքում: Ընդ որում, Հորիզոնի դեպքում խոսքը դասական ռեպորտաժի մասին չէ, այլ՝ քաղաքագետ Կնյազ Սարոյանի հետ հարցազրույցի (այդ քաղաքագետի մասին մենք նախկինում չենք լսել):

Ուշագրավ է, որ թե Հ1 Օրակարգը և թե Շանթի տաղավար հարցազրույցի հրավիրված Կնյազ Սարոյանը զեկույցը ներկայացնում են հիմնականում միայն դրական կողմից՝ բացասականին անդրադառնաով հպանցիկ: Ավելին, թե Հ1-ի լրագրողի կողմից և թե Շանթի եթերում հարցազրույցի հրավիրված Սարոյանի կողմից ԵԱՀԿ զեկույցում հեռուստատեսությունների աշխատանքի գնահատման վերաբերյալ հնչեցվում է «հավասարակշռված» բառը: Այդուհանդերձ, զեկույցում չկա նմանօրինակ բառ, և նման գնահատական չէր էլ կարող լինել:

Զեկույցը հեռուստատեսությունների աշխատանքի գնահատումը կատարում է երկու հիմնական սկզբունքով՝ ժամանակի հավասար տրամադրում բոլոր քաղաքական ուժերին և տոնայնություն:

Ժամանակ

Ըստ ԵԱՀԿ զեկույցի՝ Հ1-ի լրատվական հաղորդումներում ժամանակը քաղաքական ուժերի միջև համաչափ է բաշխվել, սակայն Շանթի դեպքում պատկերը այլ է. Շանթի լրատվական հաղորդումների ժամանակի 20 տոկոսը ՀՀԿ-ին է տրամադրվել, մինչդեռ մյուս քաղաքական ուժերին հասել է ընդամենը 7-12 տոկոս:

Տոնայնություն

Թեև ԵԱՀԿ զեկույցը նշում է, որ անմիջական քարոզչական ժամանակահատվածում մշտադիտարկված հեռուստատեսությունների տոնայնությունը 98 տոկոսի դեպքում չեզոք կամ դրական է եղել, այդուհանդերձ նախաքարոզչական շրջանում՝ փետրվարի 24-ից մարտի 4-ն ընկած ժամանակահատվածում, մշտադիտարկված հեռուստատեսությունները ցուցաբերել են հստակ կողմնակալություն՝ հօգուտ այն կուսակցությունների, որոնց հետ կոնկրետ հեռուստաալիքները հրապարակայնորեն ասոցացվում են: Ըստ ամենայնի, հենց այս նկատառումից ելնելով՝ ԵԱՀԿ զեկույցում առաջարկվում է հեռուստատեսությունների լրատվության մշտադիտարկում իրականացնել ողջ տարվա կտրվածքով:

Քննադատություն

Բացի վերոնշյալ կետերից ԵԱՀԿ/ԺՀՄԻԳ զեկույցը նաև նշում է, որ «հեռարձակվող լրատվամիջոցների ազատությունը սահմանափակված էր դրանց սեփականատերերի կողմից խմբագրական անկախությանը միջամտելու միջոցով: Դա հանգեցրեց լրագրողների ինքնագրաքննության և կառավարությանը քննադատող հաղորդումների ապաքաջալերմանը, ներառյալ հանրային հեռուստատեսությամբ»:  Այս միջամտությունը ըստ ԵԱՀԿ-ի՝ «ապաքաջալերում է կառավարության քննադատական լուսաբանումը, այդ թվում՝ Հանրային հեռուստատեսությամբ: Ընտրություններին առնչվող նորությունները, որոնք հանրային հետաքրքրություն են առաջացնում, այդ թվում՝ դպրոցների տնօրենների կողմից կազմված աջակիցների ցուցակների հրապարակումը, ԿԸՀ ներկայացված ընտրություններին առնչվող բողոքները չեն լուսաբանվել Հանրային հեռուստատեսության երեկոյան 21:00-ի լուրերի թողարկումներում, բայց լուսաբանվել են այլ լրատվամիջոցների կողմից»:

Հետևաբար, ԵԱՀԿ/ԺՀՄԻԳ զեկույցի հեռուստատեսությունների աշխատանքի գնահատականը որևէ կերպ չի կարելի բնութագրել որպես «հավասարակշիռ»: Զեկույցում այս բառը չի կիրառվում, և բացառապես դրական կողմից զեկույցի լրատվամիջոցների վերաբերյալ հատվածի ներկայացումը Հանրային հեռուստատեսության կողմից հասարակական կարծիքի մանիպուլյացիա է և ուրիշ ոչինչ:






Կարդացեք նաև։

Հ1-ը լռում է զինծառայողի վիրավորման հանգամանքների մասին

Վերջին օրերին հայկական ԶԼՄ-ների ուշադրության կենտրոնում հայտնվեց նախկին զինծառայող Ալբերտ Դալլաքյանի վիրահատության համար անհրաժեշտ գումարի հանգանակության կազմակերպումը։ Դրամահավաքին միանալու կոչ էր արել էր նաև պաշտպանության նախարար Վիգեն Սարգսյանը։ Սարգսյանի կոչից…


Ինչպե՞ս ստուգել լուրի իսկությունը

Վերջին տարիներին լրատվական սեգմենտում հաճախ կարելի է հանդիպել կեղծ տեղեկություների (Fake news), որոնց զոհը դառնում են ոչ միայն շարքային քաղաքացիները (սպառողները), այլև լրագրողները։ Լրագրողները, հաճախ ցանկանալով ավելի արագ հրապարակել այս…


Վիգեն Սարգսյանը և Հ1-ը սուտ տեղեկություններով վարկաբեկում են ուսանողներին

Նոյեմբերի 7-ին Հանրային հեռուստաընկերության «Օրակարգ» հաղորդման 21։00-ի թողարկումը նշում է․ «տարկետման իրավունքը սահմանափակող օրենքի դեմ բողոքող ուսանողները պահանջել են հանդիպում կրթական ու պաշտպանական գերատեսչությունների ղեկավարների հետ։ Վիգեն Սարգսյանն ընդունել է…


Հ1-ը «փոխեց» աշխարհահռչակ գիտնականի կարգավիճակը

Նոյեմբերի 7-ին Հանրային հեռուստաընկերության «Օրակարգ» հաղորդման առավոտյան 9-ի թողարկումը լուսաբանել էր համաշխարհային ճանաչում ունեցող հայազգի գիտնականներ Յուրի Օգանեսյանի և Անի Ափրահամյանի հանդիպումը ՀՀ նախագահ Սերժ Սարգսյանի հետ։ Անգրագիտություն «Օրակարգը» այս թողարկման…